– Divtasvuonan la miján skåvllå gånnå l sáme åhpadibme, ja sidáv sij gudi lij sámegielav válljim, ja gudi sihti dav gielav oahppat, galggi kultuvralasj vásádusájt oadtjot.
Bágo gulluji Mikkel Eskil Mikkelsenij, guhti l iesj kultuvrabargge ja girkkomusihkkár, ja guhti dálla kantorin barggá Divtasvuona girkkon.
Mikkelsena miella la muddo l dal sáme kultuvralasj skåvllåvuossav oahppijda fállat – ja ij dåssju sámijda.
– Dat la buorre vuohke tjalmostittjat ja vuosedittjat gudi lij sáme. Dan baktu vuojnni åsijt sáme kultuvras.
Juoga ma sidjij gullu
Mikkelsen la vuostasj sajen Vuona sámij rijkasiebre listan dán Sámedikkeválgan. Ja kultuvraåvddånbuktem ja kultuvrraniektem la akta moattet ássjijs massta sån berus.
– Jus máná galggi riekta lahkáj válljit, de hæhttu sebrudagán liehket juoga mij sijá válljimijt ja sijá mærrádusájt duosstu. Jus máná e vuojne jalik gulá, ja dåbddi sijá kultuvrra ij la oassen stuorra sebrudagás, de ij la juoga mij duodas sijáv. Gå vuojnni dáv buvtadimev, de jáhkáv oadtju duodastusáv sijá kultuvralasj gullogisvuohtaj, ja aj gielalattjat.
Åvddågåvvån
Mikkelsen vuoset aj oarjjelsáme teahtarij mij la ålov buvtadam, valla ælla bessam julevsáme guovlon manádit.
– Gå dal diehtep Bådådjon ja Fuoskon la dagu sáme kultuvrra ja giella ællánime, de viertti dat aj liehket oassen, dat sæmmi ájádus.
Mikkelsen buojkudahttá gå la iesj manádime, de iejvvi ulmutjijt gudi tjuottjodi ietjasa riektáv ja kultuvrav. Ja sån åhtsål juojddá mij de ietjas kultuvrav ja duogátjav spiedjildasstá.
– Sij spiedjildassti juoddá munji masi mån dåbdåv dát la dat kultuvrra gåsi mån gulluv. Dat la aj sivvan gå mån manáv sáme konsertajda. Ja de gehtjav dájda mijá nuorajda. Le gus siján dat sæmmi fálaldahka? Le gus siján juoga gåsi bessi gæhttjat? Le gus siján åvddågåvå guhti tjuottjot sámegielav ja kultuvrav, ja guhti dájt ájnas ássjijt bajet?
