Ođđa TV-ráiddu «Vi lover et helvete» váldoneavttár Aili Kristine Eira (24) lea ilus go viimmat sáddegohtet ráiddu.
– Lea gal veaháš ártet go dál oainnán iežan vuos dás lávddis ja de álgá TV-ráidun, lohká Eira.
– Erenoamážit danne go lean mun gii oidnon, muhto dattetge lea son, gean neavttašan, gean čuovvut. Mun in leat gal nu olu jurddašan dán birra, veaháš guođđán dieid bargguid.
Gaskavahko lei TV-ráiddus premiearafeasta Oslos, ja lea oaidnin láhkái NRK TV:s.
Ráhkisvuohta ja dálkkádatdáistaleapmi
Ođđa NRK TV-ráidu «Vi lover et helvete» muitala veadjemeahttun ráhkisvuođas guovtti olbmo gaskkas, geain lea sierralágan eallinoaidnu ja eallinbiras.
TV-ráidu lea muitaluvvon sámi geahčastagas, nu mo sámi árbevierut leat sámi birrasis.
Daniel ja Elin leaba soai, gean guovtto čuovvut muitalusas.
Go Daniel (Sigurd Kornelius Lakseide) ja Elin (Aili Kristine Eira) fuobmába ahte leaba goabbat bealde identitehtagilvvus ja seamma maiddái ruvkeriiddus Finnmárkkus, de čuožžilit hástalusat.
Elin ja Daniel dahkaba vaikko maid vai sáhttiba leat fárrolaga.
– Elin dovdá olu ovddasvástádusa ja alla vuordámušaid olbmuin iežas birrasis, vaikko duohtavuođas ii dáidde aiddo nie gal. Dávjá lea dolkan ja váivvis, várra jáhkká ahte ii olat iežas rahčamušaiguin gosage, muitala Aili Kristine.
Ráiddus ii leat Danielas bargu ja son váldá barggu ruvkkes vai nagoda eatni veahkehit ruđalaččat ja maid ruhta dieselii.
Elin lea boazosámi dilis ja su lea garra dáistaleapmi ealáhusa ovddas.
– Dárbu dákkár muitalussii
NRK profiila Silje Nordnes dadjá dehálažžan fuomášuhttit dán lágan hástalusaid.
– Lea buorre go NRK vállje dákkár ráidduid ja go diet fáddá lea, jáhkán dát sáhttá fuomášuhttit dáid hástalusaid olles Norgii ja de oahppá das veaháš, dadjá son.
Nordnes lei okta dain geat ledje premiearafeasttas go dát TV-ráidu vuosttaš geardde čájehuvvui ja sus lea alla vuordámušat ráidui.
– Dáppe lea somá leat mielde ja smáđáhkes olbmot. Dál šaddá gelddolaš čuovvugoahtit dán ráiddu.
Aslak Heika Hætta Bjørn čuovvola Nordnes:a. Son lea Rukses bellodaga stuorradiggejoavkku ráđđeaddi ja lávlu ja lávllačálli «Ondt Blod»-joavkkus, geaid musihkka maid gullo ráiddus.
– Lea áigi ahte dákkár ráidu boahtá, sámi kultuvra lea erenoamáš ja gelddolaš, ja mis han leat olu erenoamáš muitalusat maid galggašii muitalit.
Máŋga sápmelačča ođđa TV-ráiddus
Eila Ballovara Varsi (22), Deanus eret, neavttaša Elina oappá dán ráiddus.
Okta gii Nils Gaup «Ofelaš»-filmmas lei neavttárin, Inger Elin Utsi, son neavttaša ges oappážiid eatni, Rávnná.
Fenomen tv og scene AS dat lea ráhkadan ráiddu NRK ovddas. Seamma fitnodat lea ráhkadan earret eará NRKa dovddus ráiddu «Rådebank». Maiddái Rein Film lea «Vi lover et helvete» buvttadeamis mielde. Rebecca Wirkola Kjellmann lea ráiddu bagadalli.
Ráiddu vuosttas oassi oidno NRK1:is ođđajagimánu 26. beaivvi dii 22:00. NRK TV:s lea oaidnin láhkái: