Filbma mii dáidá dán buoremusat govvidit, lea «Ellos Eatnu – La Elva Leve.»
35 jagi leat vássán dan rájes go «Ofelaš» šattai vuosttaš stuorra sámi filbma.
Dušše moadde filmma leat ráhkaduvvon Sámis dan maŋŋá.
Muhto dál dáhpáhuvvá juoga. Eai goassige ovdal leat ná olu sámi filmmat ráhkaduvvon go dál.
Sámi filbma ovdána
Filbmii leat stuorra vuordámušat.
Vuostáiváldin, man filbma oaččui vuosttaščájáhusas Romssa riikkaidgaskasaš filbmafestiválas (TIFF), čájeha ahte filbma deaivá dáid vuordámušaid.
Filbma gieđahallá ovtta dain deháleamos dáhpáhusain Sámi historjjás. Nammalassii Álttá-akšuvnnaid.
Aktivisttat vuosttaldedje stáhta eahpevuoiggalašvuođa sápmelaččaid vuostá.
Muhtimat álggahedje njealgudanakšuvnna bissehit buođu huksema Álttá-Guovdageainnu etnui. Aktivisttat oaivvildedje ahte eatnu berre beassat orrut ráfis, go dat gullá sámi guvlui ja lea dehálaš luossajohka.
Golmmas dain nealgudeaddjiin ledje gudneguossit filmma vuosttaščájáhusas Romssas.
Jorunn Eikjok, Synnøve Persen ja Niillas A. Somby ovttas sámediggepresideanttain Silje Karine Muotkain.
«Filbma čuzii váibmui. Mun jáhkán dat buktá ođđa vejolašvuođaid fas loktet hástalusaid. »
«Mis leat dálge máŋga sullasaš hástalusa go dalle ledje. Sámi vuoigatvuođat ja sisabahkkemat leat dušše moadde dakkára. »
«Lei erenoamáš filbma. Gaskkusta min lagas áiggi historjjá, man eat goassige sáhte vajálduhttit, nana buriin vugiin.»
Nubbi prošeakta, mii čájehuvvo vuosttaš háve Sámis, lea «ÁRRAN 360°». Dat maid čájehuvvo Romssa filbmafestiválas.
Lea dáiddafilbma máilmmi stuorra lávus. Vuosttaščájáhus lei Venezias diibmá. Čájáhus lea ovttasbargu máŋgga sámi filbmadahkki gaskka.
Filbmafestivála lea maiddái deaivvadanbáiki.
Kultuvraministtar Anette Trettebergstuen (Bb) deaivvadii sámediggeráđiin Maja Krihke Jåmain ja sámediggepresideanttain Silje Karine Muotkain.
Earret eará digaštallan dihtii sámi kultuvraeallima ja filmma boahtteáiggi.
Anette Trettebergstuen muitala dán deaivvadeami maŋŋá:
– Sámi kultuvra- ja filbmaásahusat galget vuoruhuvvot.
Sámi internašunála filbmainstituhtta jođiheaddji, Anne Lajla Utsi, áigu filbmafestiválas ovdanbuktit olles ovcci ođđa sámi filbmaproševtta.
Dat leat eanet go leat ráhkaduvvon maŋimuš 35 jagi.
Earret eará de áigu Elle Márjá Eira rešisseret filmma mii ilbmá Netflixii.
Anne Lajla Utsi jáhkká sámi filmma boahtteáiggi leat čuovgadin.
«Dál bohtet sámi filmmat bárrun! Mii doallat internašunála dási, ja sámi filmma boahtteáigi lea čuovgat!»
Eará buvttadeamit mat galget ovdanbuktot leat:
- Jevida Katja Gauriloffain
- My Reindeerherder Marja Bål Nangon
- Oro jaska Vegard Bjørsmon og Silje Burgin-Borchain
- Árru Elle Sofe Sarain
- My Dad Is A Danish Caveman Egil Pedersenin
- The Land Is My Heart Sara Margrethe Oskalin
- NRK-ráidu Heajastallan Åse Kathrin Vuolabin
Reporter
Håkon Mudenia og Dan Robert Larsen
Ansvarlig redaktør: Vibeke Fürst Haugen
Nettsjef: Hildegunn Soldal