Dál lea Reaisavuonas Mátta-Várjjagis ásahuvvon joavku man áigumuš lea čohkket sámi báikenamaid sin iežaset guovllus.Dán barggu álggaheaddji lei Sámi kulturorganisašuvdna SAKU. Dán muitala báikenamma čohkkema prošeaktajođiheaddji Reidun Vælidalu.
Seminára ja oahpahus
Gieskat finai Sámi Allaskuvlla lektor Kaisa Rautio Helander Reaisavuonas logaldallamin ja oahpaheamen báikenamma jovkui mo sii galget bargat go čohkkejit báikenamaid.Son oahpahii jovkui mo jearahallat galget, ja mo geavahit GPS`merket gos justa dat báiki lea masa sámi báikenama leat gávdnan.
Dáruiduvvamin
Reaisavuotnalaš Hjørdis Nilsen deattuha ahte dál dat ferte sámibáikenamaid registreret dán guovllus, dál dan bále go leat vel eallimin sii geat dáid namaid dihtet. Son muitala ahte eai Reaisavuonguovllus leat šat ollugat geat hállet sámegiela, danne ferte dál duomihit čohkket sámegiel báikenamaid.
Jearahallet olbmuid
Joavku mii galgá bargat dáinna, sii galget jearahallat vuorrasat olbmuid jietnabáddái ja maiddái čálalaččat vurket dieđuid nu ahte dáid maŋit áiggis fas sáhttet geavahit. Olbmot sáhttet muitalit vaikke máidnasiid main leat báikenamat maid mielde. Dáinna vugiin vurkejuvvojit de sihke báikenamat ja dološ máidnasat ja muitalusat maŋitáigái.
Suomagielas sámegillii
Muhttin báikenamat leat kárttaide merkejuvvon suomagillii, dáid namaid áigu joavku jorgalit sámegillii ja dán barggu dahká Åge Vælidálu. Son ii máhte sámegiela, muhto son lea searvan jovkui veahkehit suomagiel namaid čilget