– Vuoj, vijmak muv vuorro!

Emrik (3) gárggán vuorddá brikkon Hierenjárgan Divtasvuonan.

– Vijmak muv vuorro, vuoj, javllá sån gå gádjomvestav gåhtjoduvvá tjágŋat.
Emrik vuorddá desik vantsa maŋen galggá – gádjomvanntsa Elias.

Dá ájllega merraguollimfestiválla Divtasvuonan ásaduváj gånnå máná lidjin guovdátjin. Divtasvuona Merrafestiválan lij gahppamsloahtta, gádjomvanntsa Elias ja Gádjomviddnudagás (Redningsselskapet) lij stuoráp gádjomvanntsa.

• Lågå aj: – Sea King ja Elias boahteba

(Artihkal gåvå vuollelin joarkká)

– Akti ájn

Emrik vas gáddáj boahtá ietjas mihtoga siegen maŋŋel gå båttåv nuoren libá stebmam.

– Mån sidáv akti ájn vuoddjet, dálla dalága, javllá vájmmelis báhttja gå juolgev vat brikko nali duolmas.

Mánájdåjmaj jådediddje javllá máná riek li suohtastallam gå Eliasa siegen bessin vuodjet.

– Ávvo sijájs bájtij ja máná dåbddin Eliasav mánáj-TVis. Lidjin birrusin 100 máná vantsa maŋen juohkka biejve, javllá Roy Inge Jenssen.

• Lågå aj: – Vuolge fáron dán bahás mæhttsáj

Sea King ittjij boade

Jenssen jáhkká divna máná merraguollimfestiválan hávsskudallin.

– Moadda mánnániehke gudi bierjjedagá lidjin vat lávvodagá båhtin. Miján lij aj gahppamsloahtta, rijddim ja ietjá dåjma mánájda.

Valla ittjij sjatta ållu gåktu lidjin vuorddám.

– Sea King ittjij boade danen gå hæhttuj ulmutjijt gádjot. Gádjomvanntsa bådij ja lij dánna nágin tijma åvddål hæhttuj gájotjit.

• Lågå aj: Denne festivalen vil «alle» på i sommer

– Buorep gå jáhkkiv

Festivála jådediddje Øyvind Johansen javllá festiválajn vuorbástuvvin.

– Tjoahkken jáhkáv 1000-1200 guosse lidjin divna dåjmaj.

Sån lij vuorddám vehi gássjelisvuodajt.

– Valla ittjij nav sjatta. Diedon vehi gássjelisvuoda lij duola dagu galbaj ja nav ájn.

Festivála jådediddje la juo mierredam dát juohkka jage galggá ásaduvvat.

– Vuojnunagi sjaddá snjilltjamáno maŋemus ájllega juohkka jage, hiejtet Johansen.

• Lågå aj: Slik arrangerer du festival