NRK Meny
Normal

– Sea King ja Elias boahteba

Boahtte ájllega ásaduvvá merraguollimfestiválla Divtasvuonan.

Redningsskøyta Elias

Gádjomvanntsa Elias boahtá

Foto: Redningsselskapet

Divtasvuona merraguollimfestivála jådediddje gåhttju ulmutjijt festivállaj boahtet.

Merratjáhtjes varástjáhtjáj

Divtasvuona merraguollimfestivála jådediddje, Øyvind Johansen gåhttju ulmutjijt festivállaj boahtet

Foto: Sander Andersen

– Huj moadda dåjma Hierenjárgan sjaddi. Sea King ja gádjomvanntsa Elias boahteba ja miján la gahppamsloahtta. Sjaddá huj suohtas mánájda, javllá Øyvind Johansen.

Ållo ulmutja

Festiválla vihpá bierjjedagás sådnåbæjvváj. Johansen jáhkká ja sávvá ållo ulmutja båhti.

– Lip buoragit internehtan vuosstáj váldeduvvam, duola dagu Facebooka ja e-påsta baktu. Álgon ejma jáhke nav moattes galggi boahtet, valla dálla vuojnunagi ulmutjijs dievvu.

(Artihkal gåvå vuollelin joarkká)

Tysfjord Havfiskefestival

Dán sajen ållo dåjma ájllegin sjaddi.

Foto: Frode Jenssen

Hávsskudallama

Sån jáhttá hávsskudallat sjatta jus boadá.

Tysfjord Havfiskefestival - Sea King

Sea King boahtá.

Foto: Frode Jenssen

– Bierjjedagá Ráluovtan álggep gånnå galggap guollárbånndurav tjalmostip. Ja Hierenjárgan la oabme oasessaddje gånnå li moadda dåjma.

Øyvind Johansena mielas la Hierenjárgga, Stuorgiedde ja Ráluokta buorre saje gånnå dåhkki buorre festiválav ásadit.

– Luondov tjalmostip, galggap duola dagu Stáddátjåhkkåj ja ietjá tjåhkåjda.

Ruhtavuojto

Duodden la guollimgilpos ruhtavuojtoj, diedet Johansen.

– Ájllega stuorámus dáhpádus la guollimgilpos lávvodagá. Niellja tijma galggap stebmat ja dan maŋŋela stuorámus guolev árvustallap ja gæhttjap gut la ienemus guolijt oadtjum. Oajvveruhtavuojtto la 10.000 kråvnå.

Ådåsis álgaduvvá

Ij la vuostasj bále gå merraguollimfestiválla Divtasvuonan ásaduvvá.

– Dánna lij guollimfestiválla åvddåla mij hiejteduváj. Ja dálla lip ådåsis álggám, hiejtet Johansen.