Vil ha fleire arbeidsplassar

Valkampen i Møre og Romsdal er i gang, samtidig som leiinga i store bedrifter som Rolls-Royce skjærer ned på talet på arbeidsplassar.

Arbeidarpartiet meiner at enno meir miljøvennlege ferjer er eit stikkord for å utnytte kompetansen til dei som blir ledige i oljesektoren.

Strenge krav til miljøvennleg teknologi skal gjere det letter for norsk industri å vinne anbodskonkurransane.

– Det er dette teknologikravet som på nær sikt kan berge delar av den maritime industrien. Der er vi veldig gode, og vi kan bli enno betre.

– Her er det mange arbeidsplassar som teknologisk også kan nyttast innanfor andre område, seier Jon Aasen (Ap) fylkesordførar i Møre og Romsdal.

• Les også: NAV ventar fleire oppseiingar

Må sette i gang tiltak

Tiltak mot aukande arbeidsløyse er også noko som opptar Høgre sin fylkesordførarkandidat.

– Eg registrerer at det er tøffe tider og har mykje sympati for dei som vert ramma av dette, og difor er det ekstra viktig at det vert ført ein politikk som styrkar konkurransekrafta til norsk læringsliv, seier Charles Tøsse (H), fylkesordførarkandidat.

For dagens fylkesordførar blir det viktig å bruke Innovasjon Norge i kampen mot arbeidsløysa. Han meiner regjeringa vil redusere denne organisasjonen til nesten ingenting.

– Det er snakk om å ta vekk det lokale styret og fylkeskommunen som deleigar. Eg trur det vil svekke Innovasjon Norge, seier Aasen.

Dei to fylkesordførarkandidatane satsar ulikt, men har eit felles mål for å behalde høgteknologiske arbeidsplassar i Møre og Romsdal også i åra framover.

– Det er veldig viktig å sette i gang tiltak som sørgar for at den kompetansen som no er i Møre og Romsdal blir her og kan gjere nytte for seg på lengre sikt, seier Tøsse.