Skodde skapte trafikk-kaos på Trollstigen

Frå tidleg torsdag var det berre 10 meter sikt i området. Skodda låg grauttjukk og trafikken rørte knapt på seg. Mange stappfulle turistbussar venta på å få køyre. Det er vanskeleg for bussane å passere kvarandre på dei smale vegane når dei ikkje ser langt nok til å planlegge møteplass.

– Vi måtte stenge vegen i retning Åndalsnes, seier seksjonsleiar Torgeir Bye i Vegvesenet. Vegvesenet hadde mannskap på plass for å dirigere og organisere trafikken.

Utsikta som forsvann

På toppen flokkar vanlegvis turistane seg på utsiktsplatået og ser dei 11 hårnålssvingane ned mot Isterdalen i Rauma. Men denne utsikta forsvann i skoddeheimen torsdag.

Trollstigvegen er ein av Noregs mest besøkte turistattraksjonar. Vegen har status som Nasjonal Turistveg. Meir enn 700.000 besøkande køyrer strekninga mellom Åndalsnes og Valldal på Sunnmøre kvart år. I juli køyrer det i gjennomsnitt 2.000 bilar på denne strekninga, på enkelte dagar opp i 3.000.

Lang ventetid

– Vi har stått i kø i over ein halv time, om ikkje lenger. Trafikken har stått heilt stille, sa Ragnar Johansen frå Ålesund til NRK.

– Eg veit ikkje om eg bør snu, eller berre vente til det startar å sige oppover. Dette har eg ikkje opplevd her før, la han til.

Vegvesenet måtte sette inn ekstra folk for å hjelpe til med dirigeringa ut over dagen.

– Nokre reisande har vore sinte og oppgitt, mens andre har gitt oss tommelen opp, seier Bye.