Håper vinteren held fram i «Nordens Paris»: – Det er så fantastisk

– Vi er kjempeglade. Money Talks. Så lenge det er snø, så kjem gjestene til oss, og vi tener pengar.

Det seier dagleg leiar i Tromsø Villmarkssenter, Tove Sørensen (66), til NRK.

Sjølv om ein har passert halvvegs ut i den andre vårmånaden, så er det framleis snø på bakken i Tromsø. Dei tilsette håpar snøen blir liggande ei stund til.

– Det er veldig gøy. Ein er ute i naturen og får frisk luft. Det er fine folk frå mange ulik land, og vi har dei beste kollegaene, nemleg hundane, seier guide Markus Leutscher, før han fortset:

– Vi håpar på kaldt vêr og mykje snø.

• Ikkje alle gler seg over turistane. I Ersfjordbotn i Tromsø bæsjar turistane i hagen til Margrete.

Naturleg forklaring

I 1988, med to trekkhundar «tilsett i bedrifta», starta Sørensen opp det som med åra har blitt ei millionbedrift.

Nå, snart 40 år etter oppstarten, har bedrifta 220 hundar og 60 tilsette, og turistar som strøymer til som aldri før.

Ho er godt fornøgd med årets besøk, som er ei dobling frå fjoråret.

– Vi er kjempelykkelege for alle gjestene som kjem til oss. Det har meir eller mindre vore fullbooka.

Ho meiner utviklinga har ei naturleg forklaring:

– Kan du deg ein frå London, som aldri har sett eit tre, berre asfalt. Så får dei hoppe på ein slede og komme ut i naturen.

Frå USA

Fleire av dei tilreisande til Tromsø kjem med store forventningar om ei oppleving for livet.

Saman med ektemannen, hadde Barbara Walsh reist heile vegen frå Michigan i USA til Tromsø.

– Eg har alltid hatt lyst til å gjere dette. Dra på tur, lytte til hundane. Det er så fantastisk, og hundane er så nydelege, seier Walsh, mens guiden gjer klart sleden ho og ektemannen skal sitte i.

Sjølv har den hundeglade gründeren på 66 år ingen planar om å gi seg med det første.

– Drivkrafta er at eg ønsker å få folk ut i naturen på ein enkel og simpel måte. Det med hund, natur og bål er ein suksess.

– Plutseleg sit dei i villmarka. Det er ei glede!

«Nordens Paris» dyrare enn Paris

Det er derimot ikkje billig for dei reisande å komme til Tromsø.

Berekningar NRK gjorde tidlegare i vinter viste at ein da måtte ut med nærare 4000 kroner for eit hotellrom i Tromsø.

I snitt kosta det over 100 kroner meir for eitt hotellrom i «Nordens Paris» samanlikna med Paris.

– Prisveksten i Tromsø er det ingen andre norske storbyar som er i nærleiken av, uttalte dagleg leiar i Wiederstrøm Hotel Consulting, Peter Wiederstrøm, til NRK i februar.