Oslo tingrett slår no fast at Suel Kassembo ikkje har krav på opphald i Noreg, og at norske styresmakter var i sin fulle rett då dei forsøkte å sende han ut av landet tidlegare i år.
Den sunnmørstalande mannen kom til Noreg som tenåring, men har no budd mesteparten av livet i Noreg.
Støttespelarane til Suel Kassembo har arrangert støttekonsert, gått i fakkeltog, samla inn pengar og støtta han gjennom ei rettsak. No er det klart at dei ikkje har lukkast.
Oslo tingrett slår fast at Utlendingsnemnda sitt vedtak om å ikkje gje han asyl - og vedtaket om å sende han ut av landet - er korrekte.
I tillegg må han betale nesten 90 000 kroner i sakskostnader etter rettsaka.
I dommen heiter det:
«Retten har ... kommet til at Kassembo ikke utsettes for en reell risiko for forfølgelse dersom han returnerer til Burundi.»
– Eg er veldig, veldig skuffa, seier Suel Kassembo til NRK tysdag føremiddag.
– Vi hadde håpt at denne spesielle saka skulle få eit anna resultat, seier advokatfullmektig Malene Valkvæ Jenssen.
Jenssen seier at dommen truleg inneber at Kassembo må ut av landet i løpet av kort tid.
Suel Kassembo i samtale med advokatfullmektig Malene Valkvæ Jenssen i Oslo tingrett.
Foto: Bård Nafstad / NRKAnkar til lagmannsretten
Suel Kassembo og støttespelarane hans har allereie bestemt seg for å anke til lagmannsretten.
Advokat Christine Bjornes, som representerte Utlendingsnemnda i rettsalen, ønskjer ikkje å kommentere dommen, som dei har vunne fullt ut. Ho viser vidare til presseavdelinga.
– Vi konstaterer at tingretten har kome til at UNEs vedtak er gyldig, skriv presseavdelinga på vegne av einingsleiar Hanne Bjerkan Johnsen.
Avviser sentralt punkt for støttespelarane
Suel Hussein Kassembo har heile tida hevda at han er frå Burundi og at han var i livsfare på grunn av faren sitt politiske engasjement. Dersom norske styresmakter hadde trudd på han då han kom, ville han truleg fått opphald i 2007.
Støttespelarane hans har lagt stor vekt på dette i kampen for at han skal få bli i Noreg. Dette poenget blir avvist i dommen i Oslo tingrett:
«Selv dersom UNEs avslag på asyl i 2007 var ugyldig, vil det altså ikke innebære at Kassembo på noe tidspunkt skal behandles som om han har hatt lovlig opphold i Norge.»
Ville sende han tilbake til Burundi
Etter 19 år i Noreg la Kassembo i sommar fram ny dokumentasjon på opphavet. Kort tid etter fekk han politiet på døra med beskjed om at han no skulle ut av landet.
UNE meiner dokumenta framleis ikkje er pålitelege nok til å slå fast at han er frå Burundi. Likevel vil styresmaktene sende han tilbake til det same afrikanske landet.
Ved hjelp av ei avgjerd frå Oslo tingrett blei utsendinga stoppa i siste liten.
– Eg er redd for mitt eige liv. Eg er redd for dei same som drap min eigen far, sa han då han forklarte seg i Oslo tingrett under rettsaka i november.
Utlendingsnemnda sine representantar i retten: f.v. advokat Christine Bjornes og rådgjevar Anastasia Valland.
Foto: Bård Nafstad / NRKStøttespelarar møtte fram
Suel Kassembo har arbeid og mange vener på Sunnmøre etter å ha budd i området i årevis. Over 10 000 menneske har signert oppropet for at han skal få bli i Noreg.
Fleire av støttespelarane hans møtte fram i rettssaka nyleg.
Denne teikninga blei lagt fram i retten og skal vise heimstaden til Suel Kassembo. Advokaten hans la det fram saman med eit kart av landsbyen og meiner det viser at han snakkar sant om opphavet sitt.
Illustrasjon: Teikning / Suel Hussein Kassembo
