Torsdag melder avisa Møre-Nytt at Røde Kors vil gjennomføre nye søk etter Maja Herner fredag.
I gårsdagens avis fortalde Lars Egil Foldal at han hadde tipsa politiet om unormal ramneaktivitet aust for Skytjeåa på Engeset i Ørsta, og Røde Kors vil no undersøke dette området nærare.
– Eit mysterium
Det siste året har politi, frivillige og leitemannskap frå Røde Kors gjentatte gonger søkt etter Maja Herner i fjellet i Ørsta. Så langt har dei ikkje funne spor etter den sakna kvinna.
– Det ligg som ei klam hand over bygda at vi ikkje greier å finne ut av dette. Det er eit mysterium for heile Ørsta-samfunnet. Folk grublar og spekulerer i kva som har skjedd, seier ordførar i sunnmørsbygda Stein Aam (Sp) til NRK.
Torsdag 21. november er det eitt år sidan Herner blei meldt sakna då ho ikkje møtte opp på jobb som avtalt. Den polske kvinna, som nyleg hadde flytta til Ørsta, skulle etter planen gå ein kort tur i retning fjellet Saudehornet. Sidan har ingen sett henne.
I september i år blei det kjent at Cold case-gruppa til Kripos skulle gå gjennom etterforskingsmaterialet i saka på nytt. Innspela deira kjem i ein rapport i slutten av november og Aam håper desse vil gi ei avklaring.
– Enten at det blir gjort funn eller at dei slår fast at ho ikkje er her. Vi forventar også at det kjem nokre klare svar og at vi får vite kva som skjer vidare. Politiet og Kripos held korta tett til brystet i denne saka, seier Aam.
Har framleis håp
Herner utgjer ein av totalt 1544 personar som er registrert i Kripos si oversikt over personar som er sakna i Noreg i dag.
I Polen sit familien og venane til Herner igjen med mange spørsmål som dei enno ikkje har fått svar på. Bestevenninna, Paulina Kmiecik, fortel at det siste året har vore tøft.
– Det at vi ikkje veit noko meir i dag enn vi gjorde for eitt år sidan er vanskeleg. Det er merkeleg at ho berre kan forsvinne.
Men Kmiecik vektlegg at dei ikkje har gitt opp håpet.
– Vi som er venar og familien er sikre på at ho må vere ein anna plass enn i fjellet. Der har det blitt søkt fleire gonger, utan at dei har funne ho. Det gir oss håp om at Maja framleis kan vere i live, seier Kmiecik. Ho fortel også at dei har tett kontakt med det polske politiet om saka.
– Ikkje mistanke om noko kriminelt
I løpet av det siste året har det vore gjennomført ein rekke søk i området ved og rundt Saudehornet. Dette har skjedd både på bakken og med helikopter og drone. Politiet har også gått gjennom fleire tusen bilde som har blitt tatt av området. Likevel er det ingen spor etter Herner.
Det har florert fleire teoriar om kva som kan ha skjedd med den sakna. Nokre av vennane hennar starta ein innsamlingsaksjon for å engasjere ein privatdetektiv. Men heller ikkje det har gitt resultat. Politiinspektør i Møre og Romsdal politidistrikt, Yngve Skovly, vektlegg at det likevel ikkje er noko som tyder på at Herner har blitt utsett for noko kriminelt.
– Vi veit ikkje nøyaktig kvar ho hadde tenkt å gå og det er mange plassar som er vanskelege å kome til. Vi har søkt på stadar der det er sannsynleg at ho kan ha vore, men i og med at vi ikkje har funne ho, har vi også undersøkt mindre sannsynlege stadar. Vi har også sett på fleire hypotesar undervegs, som vi ikkje har fått støtte for.
– Vår teori er difor framleis at ho har forulykka i fjellet, seier politiinspektøren.
Han fortel at dei no ventar på innspela frå Kripos før dei vurderer om dei skal sette i verk nye etterforskingsskritt.
– Vi meiner at vi hadde gjort det vesentlege av etterforsking før vi bad Kripos om bistand. Men vi skal sjå om det er ting som dei meiner at vi bør gå meir i djupna på, eller om det er nye personar som bør bli avhøyrt.
Dei kjem også til å gjennomføre nokre utdjupande avhøyr. Det var Sunnmørsposten som først omtalte dette.
– Dette blei bestemt allereie før Kripos kom inn i saka. Når vi gjennomgjekk saka såg vi at det var enkelte detaljar som vi kunne fått litt meir informasjon om, utan at det endrar vår teori av den grunn.
Skovly fortel vidare at dei jamleg har fått tips i saka, men at ingen av desse har resultert i nye spor.
Mysteriet Maja Herner
- 21. november etter kl. 13.00Sender meldingar
Maja Herner sender meldingar til fleire kjenningar om at ho har tenkt seg ein tur «up to the mountains».
- 21. november 2018 ca. kl. 12.35På butikken
Maja Herner blir observert på ein daglegvarebutikk i Ørsta. Ho kjøper vanlege varer som ho sannsynlegvis tek med seg til bustaden sin i Ørsta.
- 21. november ca. kl. 14.30Starta turen
Maja Herner skal ha starta på turen sin. Ho parkerer bilen sin ved ein populær turveg i Vikegeila i Ørsta. Frå denne vegen kan ein kome seg til det 1303 meter høge Saudehornet.
- 21. november kl. 18.30Leiteaksjon
Det blir sett i gang ein leiteaksjon etter Maja Herner. Røde Kors og ein luftambulanse deltek.
- 21. november kl. 21.30Utvidar leiteaksjonen
Leiteaksjonen blir utvida, mellom anna med redningshelikopter frå Florø.
- 22. novemberLeitinga held fram
Mange frivillige har meldt seg og deltek i søket. Politiet opplyser kl. 13.30 at dei ikkje har nokon spor og at dei gjerne vil ha tips i saka.
- 23. novemberEndå fleire deltek
Også elevar frå folkehøgskulen i bygda deltek no i søket, saman med fleire hundre andre frivillige. Det blir mellom anna leita i hagar i Ørsta ikkje langt frå der Maja Herner skal ha starta turen sin.
- 24. november, om ettermiddagenSperra av området
Politiet sperra av eit området der det skal ha blitt funne interessante gjenstandar. Men politiet seier at funna ikkje treng om å ha noko med den sakna kvinna å gjere.
- 25. november ca. kl. 14.00Tek bilete frå helikopter
Eit politihelikopter frå Oslo bidreg med å ta foto av fjellområdet.
- 25. november, ca. 17.30Avsluttar aksjonen
Politiet melder at redningsaksjonen er avslutta. Dei trur ikkje lenger det er håp om å finne Maja Herner i live.
- 26. novemberGår gjennom bileta
Politiet opplyser at det er tatt om lag 2800 bilete frå fjellområdet som dei skal gå gjennom.
- 28. novemberLeitar igjen
Politiet opplyser at leitinga i fjellområdet held fram. Mellom anna bidreg hundar i søka.
- 29. novemberDrone
Det blir sett i gang søk med drone. Om ettermiddagen opplyser politiet at dronesøka ikkje gav resultat.
- 3. desemberOpen for alle teoriar
Politiadvokat og etterforskingsleiar Inger Myklebust Ferstad seier til NRK at dei må halde alle teoriar opne, sjølv om dei ikkje har haldepunkt for at det har skjedd noko straffbart. Same dag kjem det fram at vennar av Maja Herner har starta ein innsamlingsaksjon for å sende polske privatetterforskarar til Ørsta.
- 5. desemberRykte og spekulasjonar
Ørsta-ordførar Stein Aam stadfestar at det går mange rykte i bygda om kva som kan ha skjedd med Maja Herner. – Saka heng tungt over oss i bygda og over meg som ordførar, seier Aam til NRK.
- 6. desemberUsikkert kor høgt i fjellet
Inger Myklebust Ferstad opplyser til NRK at dei ikkje kan seie nøyaktig kor høgt i fjellet Maja Herner kan ha vore. – Dette er ikkje eksakt vitskap. Indikasjonane via basestasjonane viser at telefonen har vore oppe i høgda, men vi veit ikkje kor mange høgdemeter det er snakk om, seier politiadvokat Inger Myklebust Ferstad.
- 12. desemberVeret hindrar nye søk
Politiet ønskjer å gjere nye søk i fjellområdet, men dårleg ver hindrar nye søk. Det er kaldt i Ørsta og mykje snø i fjellet.
- 28. desemberPolsk detektivbyrå
NRK skriv at eit polsk detektivbyrå har lansert andre teoriar om kva som kan ha skjedd med Maja Herner. Detektivbyrået samarbeider ikkje med politiet i Norge.
- Nyttårshelga 2019Nytt søk
Etter tips frå publikum om observasjon av ramn gjer politiet eit nytt søk 300-400 meter over havet. Søket blir utan resultat.
- 8. januarBer om observasjonar
Politiet ber publikum melde inn observasjon av ørn og ramn nær bakken i det aktuelle fjellområdet i Ørsta.
- 10. januarNye søk
To spesialtrena hundreekvipasjar frå Møre og Romsdal politidistrikt gjorde søk i terrenget. Dei gjorde ingen funn av interesse.
- 21. januarRedde for å gå tur
Fleire sentrale personar i Ørsta-samfunnet seier at turgåinga i området der Maja Herner skal ha forsvunne har gått drastisk ned dei to siste månadane. Mange er redde grunna den uavklara situasjonen.
- 18. februarStillstand
Politiet opplyser at det ikkje er gjennomført nye søk i terrenget sidan 10. januar.
- 24. maiHar lagt planen
Politiet melder at dei har blinka ut konkrete stader dei skal leite etter Maja Herner i sommar. – Det er seks til sju stader vi er nøydde til å få undersøkt i løpet av sommaren. Vi er avhengige av hjelp fra alpine redningsgrupper og vi må vente til snøen har forsvunne. Dette er stader som er vanskelege å kome seg til og vi har ikkje vore er tidlegere, seier politiinspektør Yngve Skovly.
- 16. juliVentar framleis
Mykje snø seint på året har gjort at leitingsarbeidet etter Maja Herner framleis står på vent. – Vi ventar på at snøforholda skal bli identiske slik dei var då ho forsvann. Framleis ligg det for mykje snø i fjellet. Men planane for leitearbeidet er klare. Så vi går opp så fort forholda er gode nok, seier etterforskingsleiar Grete Hjelle til NRK.
- 15. augustStarta søk med drone
Politiet starta å søke i fjellet med drone. Det er utfordrane arbeid, og ein er avhengig av godt ver for å få noko ut av bilda.
- 22. septemberNye helikoptersøk
Politiet gjennomførte nye helikoptersøk i området rundt Saudehornet i Ørsta. Samtidig tok dei bilde av område dei ønska å sjå nærare på.
- 26.septemberFår hjelp av Kripos
Politiet i Møre og Romsdal opplyser at dei får hjelp av Kripos. Cold Case-gruppa skal no sjå gjennom alt etterforskingsmaterialet for å sjå om det er fleire etterforskingsskritt som bør bli gjennomført.
- 21. november 2019Sakna i eitt år
Maja Herner har vore sakna i eitt år.
- 22. novemberNytt søk
Røde Kors gjennomfører nye søk etter Maja Herner i Ørsta. Nye tips om mykje ramneaktivitet i eit område, der det har vore leita lite før, gjer at det blir sett i gang nye søk.