Huset til Øystein og familien flytta på seg: – Viss ikkje geologen kjem så flyttar eg

Det var førre helg at to hus blei evakuerte i Ørsta, etter melding om at det eine huset hadde flytta på seg.

– Muren i bakkant av huset har sklidd fram, trappa inne i huset har løfta seg og vi har fått sprekker i veggar, fortel huseigar Øystein Sporstøl.

I går kveld oppdaga han nye sprekkar i garasjegolvet, og varsla naboen. Då oppdaga også dei bevegelsar i huset sitt.

– Eg sa til naboen at ho måtte fare og sjekke i kjellaren. Etter fem-ti minutt kom ho joggande. Ho var tydeleg stressa og bekymra, og sa at no hadde ho også fått sprekker i muren.

Årsaka til bevegelsane i husa skal vere at det er vasstrykk i bakken.

• Les også: Facebook og Instagram har sperra vanleg etternamn frå Ørsta. Dei trur det handlar om misbruk av barn

Vil ha geolog

Etter evakueringa i helga har politiet vurdert at det er trygt for dei to husstandane å bli buande i husa sine. Politiet bestemmer dette etter råd frå NVE. Dei har geologar som har studert bilde frå staden.

NVE meiner at det ikkje er fare for at det skal gå nokon skred i området, og seier der ikkje skal vere leire.

Men Sporstøl og familien kjenner seg ikkje trygge.

– Vi har tatt mange telefonar, men på slutten av dagen når vi skal legge oss sit vi berre med fleire spørsmål. Kva skjer? Er det trygt? Skal vi stole på geologane som har studert nokre bilde?

Sporstøl vil krevje at geologar kjem for å gjere meir undersøkingar på tomta.

– Viss ikkje geologen kjem, då flyttar eg her ifrå.

Kvifor det?

– Fordi eg føler meg ikkje trygg til å vere her meir, før det har vore nokon og tatt prøver av jorda her. Det er ikkje rett for verken sambuar eller ungar å vere her om ein skal vere bekymra. Det er ikkje slik det skal vere, seier Sporstøl.

– Mellom huseigar og forsikringsselskap

Ordførar i Ørsta kommune, Per Are Sørheim (H), har følgt med på saka. Han har hatt eit møte med NVE og politiet fredag. Kommunen har sendt ut info om møtet, og skriv:

«Det vart i går meldt av politiet at NVE ville vurdere å sende ein geoteknikar til staden i dag, fredag 3. mai. NVE har gjort ei ny vurdering av situasjonen, og deira konklusjon er at her er det sig i grunnen på grunn av vasstrykk ovanfor huset.»

Dette bekreftar ordføraren.

– Det var sagt at NVE skulle sende geoteknikar til området, men det har dei gjort ei ny vurdering på i dag, og meiner at det ikkje er nødvendig slik dei ser det.

Han meiner at kommunen ikkje har noko ansvar for det som har skjedd med huset til Sporstøl og naboen, og at dette er noko dei må ordne opp i sjølve.

– Dette er i utgangspunktet ei sak mellom huseigar og forsikringsselskap. Det er klart at vi skal følge med på saka og gjere det vi kan, men det er også eit avgrensa ansvar for Ørsta kommune i slike saker, seier Sørheim.