Hotelltilsette heidra for å ha redda mor frå drukningsdøden

Den 14. juli blei turistbygda Geiranger snudd på hovudet då ein nesten to år gamal gut fall i den då svært flaumstore elva. I forsøk på å redde guten hoppa mora etter, men var sjanselaus.

Mora blei ført fleire hundre meter nedover elva, men nokre hotelltilsette høyrde ropa. Dei var snarrådige og klarte å få tak i kvinna og dro henne opp. Guten var ikkje å sjå, og blei først funne død mange timar seinare.

– Kollegaen min fekk opp kvinna. Eg fekk strekt meg ut og tatt eit godt tak i mora og drog ho inn til kanten, og så fekk eg dradd inn min kollega, fortalde Jenny Muren Knivsflå dagen etter den tragiske ulukka.

Blei heidra for redningsdåd

Fredag blei dei tre kvinnene som jobbar på Hotel Union Geiranger, diplom og blomar for å ha redda livet til kvinna.

Bjørg Thorell Krabbedal i Noregs Livredredningsselskap delte ut diplomane Ho er svært imponert over innsatsen til kvinnene, og synest det er sterkt å sjå plassen og høyre om den dramatiske dagen.

– Når folk reddar menneske frå drukning, skal dei bli heidra. Det er viktig i dette drukningsforebyggande arbeidet vi driv med, at vi heidrar dei som faktisk reddar menneske, seier Krabbedal.

Glad dei klarte å redde

Marija Levarda frå Bosnias seier ho er veldig glad ho var på rett stad til rett tid den dagen. Ho sett svært stor pris på å bli heidra.

For heltinnene er det likevel med ein bismak. Sjølv om dei redda eit liv, gjekk eit anna tapt.

– I starten kjende eg at det var veldig trist at vi ikkje kunne gjere det betre med tanke på guten, men eg har skjønt at vi gjorde ein god jobb, seier bulgarske Trayana Atanstova Lukanova-Stroycheva.

– Ei slik oppleving går sterkt inn på ein. Det følgjer oss i kvardagen. Vi skal kome oss vidare, men det har gjort sterkt inntrykk, seier ei svært prega Jenny Muren Knivsflå.

Handla på instinkt

Knivsflå seier at dei tre hoppa rett i det og ikkje hadde tid til å tenkje.

– Ein handlar på instinkt, og det gjorde vi denne dagen. Og eg er veldig takksam og glad for at vi klarte å bidra med å redde denne mora.

Knivsflå er sjølv frå Geiranger. Ho seier at ulukka har vore veldig tøff for bygda, men at det er slike ting som kan skje når ein bur i ei bygd som Geiranger.

– Vi veit at slike ting har skjedd og vil skje igjen, så beredskap og det at vi er klare for slike situasjonar er kjempeviktig, seier ho.