Utstyrt med varmedress, ull, fotoapparat og telelinse har Svein Arild Aae og nokre kameratar vore på Atlanterhavsvegen i fleire timar i dag. Dei var ikkje åleine. Mange andre tok turen ut på berga for å sikre seg bilete av uveret Urd.
– Det er utruleg fascinerande på Atlanterhavsvegen når det er stygt ver. Tida går fort, seier Aae, som kom heim med nærare 400 uvêrsbilete.
Ikkje så nært i verkelegheita
Styresmaktene har åtvara folk om å oppsøke uveret. Aae seier at dei har stått på trygg grunn og tatt bileta, sjølv om det ser ut som dei ligg i sjøkanten. Bileta er tatt med telelinse og difor kjem bølgene nærare personane enn i verkelegheita.
– Vi var ikkje i nærleiken av å få sjøvatn på oss. Vi har vett i hovudet og veit å passe oss, seier hobbyfotografen. Han bur 15 minutt unna Atlanterhavsvegen og reiser ofte dit for å ta bilete i all slags ver.
I ettermiddag var det opplett på Atlanterhavsvegen, men det var sterk vind og dønningar. Aae seier at tang og tar vart kasta opp på land av bølgene.
– Det er fantastisk å sjå på, seier Aae.
LES OGSÅ:
Ingen skademeldingar
Verken politiet på Sunnmøre eller Nordmøre og Romsdal har fått inn meldingar om skader etter uver.
– Eg trur vi går klar det verste vêret, seier operasjonsleiar ved Sunnmøre politidistrikt, Sindre Molnes.
Det blåste godt på Atlanterhavsvegen måndag ettermiddag.
Foto: Svein Arild Aae
