– Det var eit voldsomt rabalder

Det vart lite søvn på Preben Bjørdal på Stranda natt til søndag. Då stormen slo innover Sunnmøre, opplevde han at takplatene losna frå huset.

– Det var skremmande for familien. Det knaka og braka skikkeleg i veggane.

Han og kona Kari Øverås måtte ringe rundt til naboane og varsle om faren for flygande takplater.

Saman med barna Leo (15) og Ida (12) valde dei å trekke ned i kjellaren.

Havparten forsvann på vestsida

Eit slikt uvêr er ikkje kvardagskost på Kjølås på Stranda. Huset frå 1967 vart totalrenovert for seks år sidan.

– Eg hadde ikkje trudd at noko slikt kunne skje, seier han. Over halvparten av taket på vestsida forsvann.

– Kor lenge stod det på?
– Det verka som det aldri skulle slutte. Men det var nok berre i ein time.

Møre og Romsdal slapp nok unna lettare enn mange andre fylke denne gongen. Likevel skapte uvêret problem for mange:

• Fleire ferjesamband var innstilte på Nordmøre, i Romsdal og på Sunnmøre.
• Straumen forsvann fleire stader.
• På Fiskå i Vanylven kollapsa eit fjøs som vart brukt til lagring av traktorar. I same bygda fauk også takplater av eit tak på ei brakke og trefte ein parkert lastebil.
• Vegen over Strandafjellet vart stengd.
• Fylkesvegen gjennom Follestaddalen vart stengd.
• På Eikesdalsvegen i Molde kommune gjekk eit snøskred. Skredet ved Svarthammarbekken førte til at vegen vart stengd. Vegen opna opp att klokka 10 søndag,
  
  

  Les også Kraftig uvêr råkar Sør-Noreg – NRK Norge – Oversikt over nyheter fra ulike deler av landet

Få timar med søvn

Huseigaren på Stranda er glad for at undertaket er intakt. Og at vinden ikkje øydela garasjen som er under bygging.

Det vart ikkje mange timane med søvn. Men Preben Bjørdal er glad det gjekk såpass bra som det gjekk når først uhellet først skulle vere ute.