Både turoperatørar og reisebyrå melder om god pågang på bestillingar til årets sommarferie, men Tyrkia er ikkje dit folk vil reise. Tendensen er at fleire vel reisemål meir vest i Middelhavet enn tidlegare år.
– Tyrkia opplever nok ein nedgang i år samanlikna med tidlegare år, og vi har registrert at fleire operatørar melder om at dei har redusert kapasiteten til Tyrkia, seier Sverre McSevenly-Åril. Han er direktør i Virke Reise utland.
Nordmenn er opptekne av stabilitet og frykt for terror påverkar ferievalet, viser undersøkingar frå Virke.
Sverre McSevenly-Åril er direktør i Virke Reise.
Foto: Forbrukerombudet
Folk er skeptiske
Star Tour har ein nedgang på 40 prosent i bestillingane til Tyrkia i sommar og kansellerer blant anna direkteruta frå Ålesund til Antalya. Kommunikasjonsansvarleg i Star Tour, Nora Aspengren, seier uroa i Tyrkia gjer dei reisande meir skeptiske.
– Interessa er ikkje der den var i fjor. Ustabilitet påverkar nok reisevalet. Folk ynskjer kjende og kjære reisemål i sommar, seier Aspengren.
Ho seier at tendensen er den same i alle dei nordiske landa. Folk kuttar ut Tyrkia og reiser heller til Spania, Hellas og Italia.
Bjørn Johnsen trivast godt i Tyrkia, men bestemte seg likevel å selge leilegheita.
Foto: privat
Bjørn og Erna Johnsen er av dei som ikkje reiser til Tyrkia denne sommaren, sjølv om dei likar seg veldig godt i landet. For 3–4 år sidan kjøpte dei leilegheit i Tyrkia, men bestemte seg for å selje. Det er fleire årsaker til salet, men frykt for terror er ein av faktorane.
– Dei politiske tilhøva i Tyrkia er sjølvsagt ein av grunnane. Urolegheit og terror, samstundes som der er ei leiing i landet som verkar ustabil, seier Johnsen.
No har dei i staden kjøpt leilegheit i Spania.
Færre investerer
Tyrkiahus har dei siste 15 åra selt 1600 bustader i Alanya. Dei opplever at folk som har investert i Tyrkia held fram med å reise dit, men at det er færre som vil kjøpe.
– Vi merkar ein del nedgang på sal av bustader. Eg trur nok folk tenkjer seg meir om no enn før, om dei skal investere og kjøpe i Tyrkia, seier medeigar i Tyrkiahus, Arnfinn Våtmyr. Han ser slett ikkje svart på situasjonen.
– Eg meiner det er trygt å reise til Tyrkia, seier Våtmyr.
