Nattklubben er for tida stengt på grunn av ramadan, og var under oppussing då det tok til å brenne, skriv nyheitsbyrået AFP.
Klubben ligg i kjellaren i ei 16 etasjar høg bustadblokk.
I tillegg til dei nesten 30 omkomne, er også ein person send til sjukehus med alvorlege skadar, seier guvernør Davut Gül, ifølge BBC.
Guvernøren seier alle ofra er arbeidarar.
Talet på omkomne har stige gjennom dagen etter kvart som fleire døydde av skadane dei fekk i samband med brannen.
Skal etterforske
Bilete viser at brannen har gjort store skader på bygget. Ifølge kontoret til guvernøren starta brannen i forbindelse med oppussingsarbeidet.
Det er ikkje klart kva som gjorde at det byrja å brenne, men innanriksminister Ali Yerlikaya skriv på sosiale medium at brannen blir etterforska.
BBC skriv også at Yerlikaya har informert Tyrkias president Recep Tayyip Erdogan om hendinga.
Fem personar skal vere etterlyste etter hendinga, inkludert eigaren av nattklubben. To av desse er gripne, medan dei tre siste framleis er på frifot, seier guvernørkontoret i ei melding, ifølge AFP.
Istanbuls attvalde ordførar Ekrem Imamoglu var tysdag ettermiddag til stades på åstaden for å sjå på skadane og sende kondolansar til dei etterlatne. Etter besøket sa han at det var kontroll på brannen, og at han håpte det ikkje ville bli fleire offer.