Møbelprodusenten Ekornes har beslutta å samle dagens to Stressless-fabrikkar i Sykkylven på Sunnmøre. Driftsmarginane for Stressless-segmentet er nesten halvert sidan 2010 og Ekornes reknar med å spare ti millionar kroner årleg på samanslåinga.
Les også:
– Vi har stålsett oss til denne dagen, men det var ein fryktelig tung beskjed å få, seier hovudtillitsvald for Ekornes Hareid, Oddrun Hatløy Fjørtoft.
Overraska over avgjerda
Hatløy Fjørtoft fortel at leiinga den siste veka har prøvd å forberede seg på korleis dei tilsette ville reagere.
– Det er ei tung stemning her no. Folk er fortvilte og mange har teke til tårene, seier ho.
Er du overraska over at leiinga har beslutta dette?
– Ja, eg vart litt overraska over at det vart slik. Eg har vore med i prosessen ganske lenge og har sett på produksjonsstrategien, seier Hatløy Fjørtoft.
Får tilbod om jobb i Sykkylven
Konsernsjefen i Ekornes, Olav Holst-Dyrnes fortalte tidlegare til NRK at dei tilsette i produksjonsstillingar på Hareid, vil få tilbod om overflytting til Sykkylven.
Trur du at det er aktuelt for mange å pendle til Sykkylven?
– Ja, eg trur det. Vi prøver å anbefale så mange som mulig om å takke ja, seier Hatløy Fjørtoft.