I lokala til Regionavisa er dei i innspurten av arbeidet med det nye magasinet.
– Du treng ikkje fotografere alt for nært inn på sidene, seier Antonsen.
På veggen bak han heng innhaldet i den nye utgåva. Mange av sidene er enno blanke, men onsdag før påske skal magasinet vere i hendene på folk.
Antonsen er ein av mange redaktørar som har måtte ta grep i ein tøff marknad med svikt i annonseinntektene. Også opplagstala for avisene i Møre og Romsdal viser nedgang - med få unntak.
Gratisavisa droppa nyleg papirutgåva som tidlegare kom ein gong i veka. No er det nettsida og eit månadleg magasin som gjeld. Redaktøren trur konkurrentane vil følgje etter.
– Det vil ikkje gå lang tid før vi ser at Møre Nytt og Vikebladet/Vestposten er nede i to utgåver i veka, meiner han.
– Papir er liv laga
Sigurd Høst er avisforskar. Han trur lokalaviser på papir er liv laga også i framtida.
– Framtidsutsiktene til dei betalte lokalavisene trur eg er rimeleg gode. Det vil hjelpe dersom støtta vert auka slik Mediemangfaldsutvalet har foreslått.
– Eg meiner papiravisa framleis er det viktigaste produktet for lokalavisene. Amedia har funne ei løysing som kombinerer digitale utgåver med papiravis. Den fungerer godt og har gitt opplagsvekst i 2016. Eg trur likevel det er mogleg å klare seg med mindre ambisiøse nettnyheiter enn denne modellen. Nokre klarer seg også heilt utan nettnyheiter, seier han.
Høst vedgår likevel at det har vore ein reduksjon i talet på papirutgåver dei siste seks-sju åra.
– Ja, det er ein viss tendens til at aviser går ned i frekvens. Denne utviklinga har halde fram dei siste åra, men med ein litt lågare frekvens i 2016 enn i 2015.
Vil vere meir på
I Ulsteinvik meiner Hugo Antonsen at endringane dei no gjer gir dei fordelar i publiseringa.
– Vi må vere meir på no enn før. Med ei avis kvar veke var planleggingsfasen mykje lenger, no er det kortare veg til publisering gjennom nettsida vår.
Antonsen trur det er mogleg å leve godt av annonseinntekter med ei nettavis og eit magasin. Han legg likevel ikkje skjul på at det har vore økonomisk utfordrande å drive gratisavisa.
– I fjor var nedgangen på annonseinntektene på ti prosent, og med dei marginane vi har hatt så betyr det ganske mykje, i praksis ein million kroner, seier han.
– Vi såg også at denne utviklinga heldt fram no på nyåret. Medan andre aviser har både annonse- og abonnementsinntekter, så hadde ikkje vi noko anna val enn å vurdere strukturen vår.