Saka om at Trine Skei Grande gjekk på teater under den intense innspurten i budsjettforhandlingane, har vekt stor merksemd.
Venstre-leiaren hadde nemleg ein viktig avtale: ho hadde lova å sjå "Jul i Blåfjell" med sin fire år gamle nevø.
– Dette er veldig rart, og eg trur ikkje noko liknande ville ha skjedd i Tyskland, sa den tyske journalisten Sigrid Harms i Deutsche Presse Agentur til NRK.
No vert Trine Skei Grande hylla av partikollegaane sine.
– Det første Trine sa då me starta forhandlingane var "eg er budd på å stilla opp 24 timar i døgnet dei næraste dagane, men med eitt vesentleg unntak onsdag klokka 18:00. Då skal Linus og eg på teater, fortel KRF-leiar Knut Arild Hareide.
Han vart ikkje snurt då sentrumskamerat Venstre droppa politikk til fordel for barneteater.
– Dette viser korleis Trine er. Ho går fullt og heilt inn i politikken for å gjera ein positiv forskjell med sin smittande varme. Og ovanfor sine næraste held ho alltid det ho lovar, seier KRF-leiaren.
Også opposisjonspartia støttar Trine sine prioriteringar.
– Sjølvsagt kan ho gå på teater med nevøen sin! Ein skal halda avtalar, og særleg dei avtalane ein gjer med barn, seier SV-leiar Audun Lysbakken.
– Det er bra at politikarar i Noreg kan kombinera jobb og privatliv. Dette er eit døme på at politikarar har eit privatliv å ta vare på utanfor politikken, seier AP-leiar Jonas Gahr Støre til NRK.
I kveld vart det klart at regjeringspartia og støttepartia ikkje vil klara å bli ferdige innan fristen klokka 12 på fredag. Forhandlingane om statsbudsjettet blir derfor utsett til søndag.
Det veit opposisjonen å utnytta, Jonas Gahr Støre kommenterer tørt til NRK:
– Eg trur det er større utfordringar for dette budsjettet enn to timar med "Jul i Blåfjell".