Som barn i sandkassa

 - Enkelte gestikulerer med knyttenevane, då kan du sjølv tenkje deg kva dei eigentleg har lyst til å gjere.

Det er snart val, og kvar einaste dag kan vi følje politikarane i diverse duellar og debattar. Politikarane sin jobb no framover er å få di stemme.

Dei har (ofte) kontroll over kva dei seier, men har dei eigentleg kontroll over kva dei gjer?

Blunking

- Ein amerikansk psykolog gjorde ei undersøking blant politikarar i forhald til det som har med blunking å gjere. Eit menneskje som blunkar mykje vil ofte bli tolka som usikker, engsteleg osv. Og det han fann ut var at dei politikarane som blunka mest under TV-sendingane tapte valet, fortel Live Bressendorf Lindseth.

Gøy å sjå

Live fortel at ho likar å sjå på politikarane når dei verkeleg er ueinige med kvarandre.

- Politikarane vel nesten å oversjå den dei er ueinige med.

For oss som ser på debatten kan dette verke uheldig fortel Live.

- Det er fort gjort å tenkje at desse umogeleg kan samarbeide når dei ikkje klarar å snakke saman på ein ordentleg måte.

Sender signal

- Kroppsspråket vårt, særleg ansiktsmimikken vår, er dualistisk. I den forstand at vi kan sende ekte og falske signal på ein gong. Vi kan godt lære oss uttrykk med ansiktet, smile på ein spesiell måte, men på same tid vil kjenslene kanalisere det som verkeleg skjer ut gjennom ansiktsmimikken, og med det får ein eit dobbelt bodskap, fortel Live.

Og det gjer ein TV-sjåar usikker. 

HØYR INNSLAGET: Politikarar og kroppsspråk