Smøråsfjellets arbeidsglade venner

Norge Rundt NRK 1 fredag 15. juni kl. 19.30

Det starta i 1999. Christian Rieber hadde sett seg lei på at området han sjølv boltra seg i som barn var blitt så utilgjengeleg. Han inviterte med ein journalist frå Fanaposten, tok yngste barnebarnet sitt på tre år på ryggen og gjekk fram til den gamle militærvegen. Der sette han Pernille ned, i ein stor dam. «Her kan ikke Pernille gå», vart overskifta på artikkelen i lokalavisa.

Tok kontakt

Den las Johan Krohn-Hansen, og dermed starta ballen å rulle. I dag er dei to leiarar for Smøråsfjellets Venner, ein gjeng på 19 pensjonistar som har rydda skog, drenert myrer, bygd gangbruer og turvegar, gapahukar, kvilebenkar og leikeområde for barn. Dei har sett opp fuglebur, bygd utescene, laga bålplass, bygd opp att gamle steingardar og sett ut ørret i Bjørnevatn. 

 

 

Populært

I det omlag fire kvadratkilometer store området midt i hjartet av Fana har turgåarane no over ei mil med turløyper og stiar å velje mellom. Og brukt, det blir dei. Mellom 20 og 30 000 menneske bur i nærområdet, og stadig fleire finn vegen til denne naturperla. Også skulane og barnehagane i området er flittige gjester.

 Helsebot

Kvar onsdag morgon møtest karane i Smøråsfjellets Venner til dugnad. Gjennomsnittsalderen er nær 75 år, initiativtakar Christian Rieber er snart 82. Det skulle ingen tru som ser han i sving med motorsaga.

- Det er eg som har den kjekkaste jobben, dei andre må rydde opp, gliser han. Medlemmane i dugnadsgjengen møter opp så sant dei kan, uansett ver.

- Vi kan vere litt pjusken før vi kjem oss over dørstokken, men når vi går heim er vi friske, ler Rieber. Også Johan Krohn-Hansen er overtydd om at dugnadsarbeidet og kameratskapet er helsebringande:

- Kroppen er skapt for å bli brukt, det er det å bli sitjande i godstolen som er farleg, meiner han.