Det er uklart kva som har skjedd, men ifølgje nettstaden TMZ, som siterer kjelder i politiet, vart han funnen død i oppkøyrsla til huset sitt i San Fernadino i California. Han skal ha vorte overkøyrd av sin eigen bil, ifølgje kjeldene.
Skodespelaren skal ha kome i klem mellom bilen og ei postkasse av murstein, som igjen var festa til ein port. Bilmotoren gjekk framleis då Yelchin vart funnen, blir det opplyst.
Anton Yelchin var fødd i Russland, men flytta til USA saman med foreldra då han var liten. Begge foreldra var profesjonelle kunstløparar.
Yelchin var rekna for å vere ei stigande stjerne i Hollywood. Han starta karrieren med roller i såkalla indiefilmar og i TV-roller, før han fekk sjansen i spenningsfilmen «Alpha Dog» og tenåringskomedien «Charlie Bartlett».
Det store gjennombrotet kom i Star Trek, der han i tre filmar har spelt Chekov. Den siste Star Trek-filmen han spelte inn, «Star Trek Beyond» har premiere i juli i år.