NRK Meny
Normal

Politiet kastar skinnjakka

I 20 år har vi vore vant til å sjå politiet i skinnjakke nå dei patruljerer i gatene. Nå blir heile politikorpset kledd om, og skinnjakka blir historie.

Heile politikorpset får nye uniformar

KASTAR JAKKA: Politibetjent i Oslo, Monica Svenningsen kastar skinnjakka. Nå får politiet nye uniformer.

Dei nye politijakkene blei lufta for første på Egertorget i Oslo sentrum i dag. Politibetjent Andreas Øvland er blant dei som har tredd på seg den nye politijakka. Den erstattar den gamle skinnjakka, som politiet har gått med i 20 år.

– Føler du deg meir moteriktig nå?

– Vi i politiet er ikkje så opptekne av det, men det følest mykje betre, seier politibetjent Andreas Øvland.

Politibetjent Monica Svenningsen er einig i at den nye jakka fungerer bra.

– Eg treivst for så vidt godt i skinnjakka, men etter å ha prøvd den nye jakka, så ser eg at den er mykje betre tilpassa, seier politibetjent Monica Svenningsen.

Andreas Øvland, Monica Svenningsen

NY OG GAMMAL: Politibetjentane Andreas Øvland og Monica Svenningsen viser fram den nye og den gamle politiuniforma.

Foto: Jorunn Hatling

Oslopolitiet er dei første som ikler seg den nye jakka, som snart alle landets politifolk skal bruke heretter. Tilfeldig forbipasserande på Karl Johan ser ut til å like den nye politiuniforma.

– Eg syns dei ser veldig bra ut faktisk, eg liker at det er ein blanding av gult, kvitt og svart, seier Eirik Rogstad.

– Dei er fine, men eg ser ikkje så stor forskjell, seier Truls Bråthen.

– Nøytrale og tidlause

Politiet i nye uniformer

I NY MUNDUR: Oslos politibetjentar, saman med politidirektør Odd Reidar Humlegård, luftar dei nye uniformene i Oslo sentrum.

Foto: Patrick da Silva Saether

Politidirektør Odd Reidar Humlegård meiner fornyinga av politiuniformane er heilt nødvendig.

– Når våre medarbeidarar jobbar døgnet rundt, i heile landet, sommar og vinter, så må ein ha funksjonelt tøy. Det betyr mykje at ein er tørr, varm og bekvem, seier politidirektør Odd Reidar Humlegård.

– Kva terningkast vil du gje den nye uniforma?

– Den fortener terningkast seks, seier Humlegård.

Det er stor spenning blant politiet når moteredaktøren i bladet KK kjem for å vurdere dei nye uniformene.

– Eg syns dei ser veldig reine og funksjonelle ut. Dei er nøytrale og tidlause, samstundes som dei er autoritære, seier KKs moteredaktør Stine Therese Strand.

Moteredaktør i KK

MOTEDOMMEN: Moteredaktør i KK gjer dei nye politiuniformene terningkast seks.

Foto: Jorunn Hatling