21. oktober er det premiere på humorserien «Vikingane» på NRK1. Serien er ein humoristisk dramaserie sett til vikingtida.
I laurdagens «Lindmo» fortel Silje Torp om det spesielle kjede som ho måtte gå med i fem veker under seriens innspeling.
– Dette smykket som du ber på i serien er ikkje akkurat historisk korrekt, kan vi kalle det fangst frå felt?
– Du tenker på det pikkjedet eller pisskjedet som regissørane kalte. Ja det krev kanskje ei forklaring, seier Torp.
Frøya, spelt av Silje Torp, er ein av karakterane i serien. Ho både valdtar, plyndrar og kuttar penisar av munkar. Og som trofé heng ho penisane rundt halsen.
Erstatning for menneskepenis
Kostymemedarbeidarane var i tvil om korleis dei skulle lage noko som likna på innskrumpa menneskepenisar, fortel Silje Torp på «Lindmo» laurdag.
– Du kan tenke deg ein penis som har skrumpa inn, den er ikkje veldig imponerande. Så dei kostymeansvarlege laga rett og slett dildoar. Men det blei litt mykje, seier Torp.
Dermed laga kostymedesignarane eit penissmykke som er laga av ekte hud frå kvalpenisar.
Illeluktande
Nokre av dagane regna det under innspelinga, og peniskjede lukta meir og meir som dagane gjekk. Kåre Conradi, som også har ei rolle i serien, fekk sympati for Silje Torp som måtte gå med det illeluktande kjede.
– Det lukta meir og meir for kvar einaste dag. Det var vanskeleg å vere Silje Torp etterkvart. I tillegg hadde dei berre eit kjede, så dei kunne ikkje bytte det ut med eitt friskt eitt, seier Conradi.
– Eg prøvde å dra kjede litt lenger ned for å unngå stanken, men fekk streng beskjed om å heise smykke opp igjen, humrer Silje Torp.
Alle episodane av «Vikingane» blir lagt ut på nett 14.oktober, ei veke før serien har premiere på NRK1.