Markus Neby skal leie ny julekalender: – Kjenner jo på nokre nervar

– Ein kjenner jo på nokre nervar før ein skal inn i eit rom for fyrste gong og så ser du Olaug Bollestad, Christian Borch og Mayo Indiran sitje på ein tribune og ventar på deg.

Det seier Markus Neby før han fortset:

– Men det var jæskla gøy, og eg tar jo både jula og oppgåvene på fullt alvor sjølv.

Til vanleg ser vi han som sidekick i «Kåss til Kvelds», men denne gongen har Neby tatt på seg programleiar-hatten.

I «24-stjerners julekalender» skal han lose kjendisar gjennom ulike utfordringar som ofte dukkar opp i jula.

– Dette er ein julekalender som tar jula på blodigaste alvor, med mykje kødd og fjas, og kjente fjes du blir veldig glad i – i takt med at dei mistar verdigheita si, seier Markus Neby.

Vakter måtte nesten gripe inn

Kjendisane skal mellom anna bryne seg på julesong, julebakst og juletrepynting.

Men ting blir ikkje alltid gjort på den tradisjonelle måten, for som vi alle veit, kan Neby vere ein luring. Deltakarane må vere førebudd på alt.

For eksempel er det ein konkurranse der deltakarane får i oppgåve å kvese som ein katt og skotte som ei rotte.

– Ganske dumt, men deltakarane går så hardt inn i det, at vakter nærmast måtte gripe inn.

Den som gjer det dårlegast må forlate konkurransen, heilt til det står igjen éin til slutt. For på sjølvaste julaftan blir vinnaren kåra.

– Blei utmatta og traumatisert

Det er fyrste gong NRK har ein julekalender som vikar frå barneformatet.

Blant kjendisane som skal prøve seg på julestria finn ein mellom andre påverkar Øyunn Krogh, dansar Helene Spilling, politikar Olaug Bollestad, TV-personlegdom Mayoo Indiran og politikar Lan Marie Berg.

Berg er ærleg om korleis det var å vere med:

– Eg deltok for å utfordre meg sjølv. Dette var det skumlaste eg kunne sjå for meg, og eg blei både utmatta og litt traumatisert. Det blir høg putefaktor, så eg trur folk kjem til å elske det.

Dansar Helene Spilling trur kalenderen vil skape meir enn berre begeistring:

– Eg trur mange der heime kjem til å vere både begeistra og sjokkert over kva dei ulike TV-profilane har klart å tulle seg bort i.

Forstår at folk er lei av kjendisar

Markus Neby forstår den som er lei av kjendisprogram.

– Men eg lovar at kjendisane skal få gjennomgå, både verbalt og gjennom oppgåvene, så håpar det gjer det litt lettare!

– Og så blir jo dette det aller, aller siste kjendisprogrammet. I alle fall i 2022.

Desse er med i «24 stjerners julekalender»:

Amir Asgharnejad (37)

Billed-kunstnar, skodespelar, komikar og stuntreporter

Sofie Frøysaa (32)

Komikar og samfunnsdebattant

Martin Lepperød (29)

Komikar, radioprofil

Wanda Mashadi (30)

TV-profil og påverkar

Lan Marie Berg (35)

Politikar i MDG

Mathias Luppichini (30)

Skodespelar og musikar

Aurora Gude (30)

TV-personlegdom

Mayoo Indrian (32)

TV-personlegdom, programleiar og føredragsholder

Christian Borch (78)

Pensjonert utanriksreporter og nyheitsanker, forfattar, føredragsholder.

Ingrid Gjessing Linhave (45)

Programleiar, journalist og TV-regissør

Emil Gukild (30)

Programleiar

Øyunn Krogh (27)

TV-personlegdom og påverkar

Wasim Zahid (47)

Lege, youtubar og folkeopplysar

Olaug Bollestad (61)

Politikar i KrF

Ailo Gaup (43)

Tidlegare FMX-utøvar

Katrine Moholt (49)

Programleiar

Tete Lidbom (36)

Programleiar

Vita Mashadi (30)

TV-profil og påverkar

Safari Shabani (24)

Komikar og skodespelar

Helene Spilling (25)

Dansar

Hasse Hope (36)

Komikar

Silje Norendal (29)

TV-profil i Viaplay og tidlegare snowboardar

Aleksander Sæterstøl (27)

TV-personlegdom og påverkar

Lasse Matberg (37)

TV-personlegdom og tidlegare Løytnant i Forsvaret

Meir info om julekalenderen følgjer under: