– Vi veit ikkje kva som ventar oss i Moskva, og det er vi redd for på fleire måtar, seier Thorstein Grude, produsent bak «The Magnitsky Act – Behind the scenes».
Då filmen hadde premiere på Filmen Hus i helga var det fleire i salen som stilte spørsmål ved innhaldet og dokumentasjonen bak den. Tysdag 28. juni skal filmen visast på Moskva Internasjonale Filmfestival.
- Les også:
- Les også:
Ventar motstand i Moskva
– Andrei Nekrasov, filmens regissør, er ein dissident, ein sterk Putin-kritikar gjennom mange år, han har levd under vern i Noreg, seier Grude.
Nekrasov er kjent for å vere ein Putin-kritikar, og kom til Noreg i 2011 under friby-forfattarordninga. No vert han skulda for å drive Putin-propaganda.
– Då vi gjorde opptak til filmen vår i Russland smugla vi han inn i landet. No er det fyrste gong han reiser inn i Russland under fullt namn, seier Grude.
Men ifølgje Nekrasov har ikkje Kreml noko med saka å gjere. Regissøren meiner at filmen handlar om eit økonomisk brotsverk som vert tåkelagt av politikk, menneskerettar og kjensler rundt ein person som døydde i fengsel.
– Eg trur debatten kjem til å bli endå kraftigare i Moskva, seier Nekrasov.
Trugslar om søksmål
Men det er ikkje berre i Russland filmen kan skape problem.
Browder har sidan Magnitsky døydde drive ein stor kampanje kalla rettferd for Magnitsky. Saman med Magnitsky sin familie har han trua ei rekke aktørar med søksmål for ærekrenkingar om filmen vert vist.
Kortfilmfestivalen i Grimstad, EU-parlamentet og den tysk-franske kringkastaren Arte har stoppa visingar av den.
– Ikkje beskytta av ytringsfridomen
– Dette er ein grovt ærekrenkande film som ikkje er beskytta av ytringsfridomen, seier Carl Bore, Magnitsky-familien og Browder sin advokat i Noreg.
Ifølgje Bore rettar filmen skuldar om grove straffbare forhold mot avdøde Magnitsky, og til dels også mot William Browder. Han meiner at filmvisninga i Oslo vil få konsekvensar.
– Det vil seie eit søksmål?
– Det er ein vurdering eg ikkje vil gå inn i no, men det kjem vi tilbake til, seier Bore.
Grude seier at han i så fall er klar til å forsvare filmen i retten.
– Vi er redd for å bli saksøkt, men vi er ikkje redd for å stå i retten og forsvare filmen vår, seier Grude.
