Ikkje auka kulturkonsum

Då finanskrisa slo inn hausten 2008 venta mange kulturaktørar at forbruket av kulturarrangement ville auke.

Dette baserte seg på at ein etter det store børskrakket 1929, utover i dei økonomisk vanskelege 1930-åra såg at folk deltok på fleire kulturaktivitetar som konsertar, kino og teater enn i økonomiske oppgangstider.

Men no viser undersøkinga Kulturkonsum i krisetider frå Handelshøyskolen BI, utført i perioden november 2008 til juni 2009 at kulturkonsumet ikkje har auka. Undersøkinga syner at tala for kulturforbruk er ganske stabile i forhold til juni-november 2008.

- Dei dårlege nyhenda er at kulturkonsumet ikkje går opp. Dei gode nyhenda er at det heller ikkje går ned, seier professor og prosjektleiar ved Handelshøgskolen BI, Anne-Britt Gran.

• LES ÒG: Finanskrise rammer islandsk kulturliv
• LES ÒG: Finanskrise gir sponsortørke

Nedgang for kino

Scenetilbod som teater, konsertar, opera, stand up går publikum på like ofte som før. Like mange som før går på kino, om lag 65 prosent. Men dei som går på kino går ikkje like ofte på kino som tidlegare, gjennomsnittleg tal på kinobesøk går nemleg ned frå 4,3 til 3,8 gonger.

(Artikkelen held fram under biletet.)

Auka DVD-sal blant unge

Totalsalet av CD-ar, DVD-ar og bøker har heller ikkje endra seg. Men blant bokkjøparar under 30 år syner det seg at dei kjøper færre bøker enn tidlegare, frå 9,7 til 6,3. Salet av DVD-ar i aldersgruppa 15-29 år har auka frå 5,1 til 6,6.

Som hausten 2008 har om lag 17 prosent av innbyggjarane i Noreg har kjøpt kunstverk, men undersøkinga seier ikkje noko om prisane på kunsten.

Slår hòl på myten

Då dei tok til med forskinga førre haust, visste dei ikkje noko om korleis finanskrisa ville slå ut for kulturlivet.

- Det er tydeleg at det er heilt andre ting som styrer kulturkonsumet enn den akutte finanskrisa, seier Gran til NRK.

Anne-Britt Gran var blant dei som ikkje trudde på nokon særleg auke i bruken av kulturtilbodet, men ho er likevel overraska over at det har halde seg så stabilt.

Skilnaden på den teknologiske utviklinga, kan vere ei av årsakene til at ein i dag ikkje ser den same tendensen som på 1930-talet, trur Gran. I 1930-åra gjekk til dømes kinobesøket opp, medan det i dag går ned.

• HØYR ANNE-BRITT GRAN ANALYSERE RESULTATA: Kulturkonsum i krisetider

- På 1930-talet hadde dei trass alt ikkje tv og internett. I dag ein kan vere storkonsument av kultur utan å gå ut av stova si, seier Gran.

Digitalt kulturkonsum utanom

Undersøkinga skil mellom kjøp av fysiske produkt, og nedlasting og streaming av musikk.

- Vi konstaterer at det analoge forbuket er relativet stabilt etter finanskrisa og at det digitale konsumet aukar, men vi kan ikkje direkte knyte denne auken til finanskrisa, seier professor og prosjektleiar ved Handelshøgskolen BI, Anne-Britt Gran i ei pressemelding.

Funna for bruken av digital kultur vil verte offentleggjorte seinare i november.

• Kvifor trur du folk går mindre på kino enn før finanskrisa?