Dronninga debuterer som kunstnar

Dronning Sonja er ein profilert kunstkjennar og -samlar, og no blir majesteten også utøvande kunstnar. Ho debuterer med åtte grafiske djuptrykk, saman med biletkunstnarane Ørnulf Opdahl og Kjell Nupen, i utstillinga «Tre reiser - tre landskap».

Med eigne fotografi frå Svalbard som utgangspunkt har dronning Sonja jobba seg gjennom den omstendelege og kompliserte prosessen det er å lage slike kunstverk.

– Eg var på Svalbard ein vinterdag i april, under snøen, i ein isgang som var heilt mørk. Eg tok bilete og vart veldig forbausa over resultatet eg såg. Det var heilt fantastisk korleis isen hadde forma desse veggane, det var som å gå gjennom eit glashus, fortel dronninga til NRK.

50 eksklusive trykk

Dronninga har tatt steget ut i den utøvande kunstverda for å hjelpe unge kunstnarar. Pengane frå salet av trykka skal gå til eit nordisk stipend for papirbasert kunst som ho har oppretta saman med Nupen, Opdahl og Ole Larsen.

Det er i Larsens internasjonalt kjente trykkeri i Helsingborg at kunsten er blitt produsert, og vinnaren av stipendet får eit opphald her.

– Papirbasert kunst har ikkje vore så høgt estimert som måleriet kanskje har vore. Eg synest det er veldig hyggeleg å kunne få vere med på å inspirere unge kunstnarar, seier dronning Sonja.

I heile sitt vaksne liv har dronninga drøymt om å kunne gi ut eit slikt kunststipend. Kunstnarane har bidratt med åtte trykk kvar og opplaget skal vere på 50 signerte salseksemplar. Mange av desse er selt allereie.

– Blir heilt bergtatt

Dronning Sonja har gjort over 100 prøvetrykk før det endelege resultatet var klart, og stått for dei aller fleste av desse sjølv.

– Det å tørre å gjere noko sjølv, det er ganske utfordrande. Ein gløymer alt, jobbar til langt på natt og har ikkje tid til å ete eller nokon ting. Ein blir heilt bergtatt, for det er så spanande å sjå korleis neste plate blir sjåande ut, seier dronninga entusiastisk.

Kjell Nupen og Ørnulf Opdahl har vist dronninga den avanserte teknikken som ligg bak grafiske trykk. I timesvis har dronninga stått konsentrert over glasplatene.

– Det arbeidet vi vanlegvis har assistentar til å gjere for oss har ho gjort på eiga hand, for å kome under huda på teknikken, fortel Nupen.

Les også: Kunstentusiasten

– Kvalitetar som vi trur på

Biletkunstnarane er imponert over majesteten sitt kunstuttrykk og har blitt inspirert av å jobbe med dronninga.

– Det har vore fascinerande å sjå ei utvikling som heile tida er til stade. Det berre stig, smiler Ørnulf Opdahl.

På spørsmål om kva som kjenneteiknar kunsten til dronninga svarar Kjell Nupen slik:

– Nysgjerrigheit, audmjukskap og ærbødigheit for kunstuttrykket. Det ligg kvalitetar der som vi trur på.

Utstillinga blir å sjå første gong på Dunkers Kulturhus i Helsingborg 10. november. Stipendet blir delt ut første gong 14. juni 2012, i samband med at utstillinga kjem til Henie Onstad Kunstsenter. Deretter vil dei eksklusive kunstverka bli vist fleire stadar i Noreg.

Sjå reportasje om dronning Sonja i Dagsrevyen: