I dag var den europeiske sjefen for offentleg politikk i Facebook, Richard Allan, på noregsbesøk. Han deltok på eittårsjubileet til nettsida slettmeg.no og snakka om personvern og vidare utvikling av Facebook.
– Facebook er blitt ein del av den norske samtalen, seier han til NRK.
I dag er halvparten av Noreg på Facebook, og 62 prosent av brukarane er innom nettsida kvar veke .
På norsk
– Spesielt land med god Internett-tilgang har fått mange Facebook-brukarar kjapt. Noreg er eit av desse landa, fortel Allan.
Han trur god nettilgang kombinert med ein norsk versjon, både på bokmål og nynorsk, er grunnen til at Noreg er blant landa med flest Facebook-brukarar i forhold til folketalet.
Sletting av profilar
Facebook har tidlegare fått kritikk for at det er for vanskeleg å forstå personvern-innstillingane deira, og spesielt når det gjeld sletting av profilar.
– Det er mogleg å forlate Facebook. Ei moglegheit er å deaktivere kontoen sin slik at den blir usynleg. Då ligg all informasjonen der framleis slik at du kan aktivere den igjen. Om ein vil slette profilen sin for godt må ein ta kontakt med oss, og vi vil fjerne den, seier Facebook-sjefen.
Dersom informasjonen har spreidd seg vidare til andre nettstadar er det opp til dei å fjerne det, ifølgje Allen.
– Brukarane eig alt
Allen meiner Facebook samarbeider godt med Datatilsynet om personvern, og har nettopp difor tatt turen til Noreg.
Ifølgje han er personvern noko nettenesten tek svært alvorleg.
– Brukarane eig alt dei legg ut. Dei kan når som helst fjerne innhald dei ikkje vil ha på Facebook. Vi treng tillatelse til å leggje ut informasjonen deira på tenesta vår, men det er deira data, forklarar Allen.
- Les også: