I desse dagar held Lorin Maazel sine første konsertar som sjefdirigent for München-filharmonien. Maazel skulle eigentleg ikkje starte i jobben før 2012/13-sesongen, men sidan den tidlegare sjefdirigenten Christian Thielemann rauk uklar med leiinga i orkesteret, tok han over eit knapt år før planen.
Les:
Dirigerte New York-filharmonien i Nord-Korea
Lorin Maazel har hatt ein lengre og meir innhaldsrik karriere enn dei fleste dirigentar kan drøyme om. Han vart rekna som eit vidunderbarn, og dirigerte NBC-orkesteret på radio allereie som elleveåring.
På 1970-talet var han sjefdirigent for Cleveland-orkesteret, og på 1980-talet dirigerte han nyttårskonserten i Wien fleire år på rad. På 2000-talet leidde han New York-filharmonien, mellom anna under orkesterets besøk til Nord-Korea i 2008.
Attraktive for unge musikarar
Ole Kristian Ruud, professor i dirigering og orkesterleiing ved Norges Musikkhøgskole, ser høg alder som ein fordel i dirigentrolla:
– Dei eldste dirigentane sit inne med ein repertoarkunnskap og kjennskap til tradisjonen som vi yngre ikkje kan måle oss med, seier Ruud til NRK.no.
– Dei vidarefører tolkingar og særpreg som ikkje er like vanlege i dag, og unge musikarar er gjerne ivrige etter å jobbe med dei.
Ingen grunn til å gi seg
Han ser ingen grunn til at dirigentar skal gi seg tidleg om helsa er god nok til å halde fram:
– Dirigentar er kjende for å jobbe til dei stuper, og det er ikkje uvanleg for dirigentar å vere aktive til dei er langt oppi åra. Det kan vere vanskeleg å halde fram dersom ein får dårleg hørsel eller minnet sviktar, men mange 80-åringar i dag er jo svært spreke.
Ruud er ikkje det minste bekymra for at Lorin Maazel skal vere for gammal for jobben:
– Maazel er kjend for sin store kunnskap, eit ekstremt godt øyre for musikken og godt minne, og han er frisk og opplagt.
Fleire veteranar i bransjen
Den 78-årige italienaren Claudio Abbado er kanskje den mest suksessrike veteranen i bransjen i dag. Han speler i år inn ei rekkje cdar, til dømes saman med den kinesiske pianisten Yuja Wang, som nyleg vitja Oslo Konserthus. Seinare denne sesongen skal han mellom anna dirigere Berlin-filharmonien.
Les:
Andre dirigentar i øvre aldersklasse som held seg i toppdivisjonen, er nederlandske Bernard Haitink (82), austerrikske Nikolaus Harnoncourt (81) og svenske Herbert Blomstedt (84).
Les: