Høyr den nye Flåklypa-musikken

Knut Avenstroup Haugen (39) er frå før mest kjend for musikken til dataspelserien «Age of Conan», som mellom anna har gitt han ein pris og fleire nominasjonar i «Hollywood Music in Media Awards».

– Eg har laga mykje musikk av ein heilt annan karakter, gjerne både dyster og dramatisk, seier Knut Avenstroup Haugen.

– Det var i grunnen frigjerande å jobbe med eit materiale som skulle vere det motsette – dette skal vere koseleg, lystig og hyggeleg.

– Hadde stor ærefrykt for oppgåva

Musikken i «Flåklypa Grand Prix» frå 1975 er skriven av danske Bent Fabricius-Bjerre (f. 1924), og er kanskje den mest kjende musikken frå ein norsk film nokon gong. Haugen kjenner ikkje prestasjonsangst av den grunn:

– Ikkje no lenger, men i byrjinga hadde eg stor ærefrykt for oppgåva, seier han.

– Eg var spent på å ta tak i noko som er så elska av heile det norske folk, som alle kjenner og har eit forhold til. Det har vore viktig å skape ei stemning i filmen som passar til Flåklypa-universet, så eg har valt å ikkje fjerne meg altfor langt frå det musikalske uttrykket i «Flåklypa Grand Prix».

– Samstundes må jo musikken vere original, så min musikk er naturlegvis annleis – eg har ikkje prøvd å gjenskape musikken. Eg har prøvd å halde fast ved stemninga, som er koseleg og folkeleg. Det er også viktig med tydelege melodiar som folk kan hugse. Målet er at folk skal nynne på desse melodiane når dei går ut av kinosalen.

– Det skal vere noko tidlaust over musikken

I tillegg til dokkefilmen frå 1975, har Solan og Ludvig tidlegare vore framstilt på filmlerretet i teiknefilmen «Solan, Ludvig og Gurin med reverompa» frå 1998.

– Det har vore viktig for oss å lausrive oss frå begge dei tidlegare filmatiseringane, fortel Rasmus A. Sivertsen (41), regissøren som denne veka la siste hand på «Jul i Flåklypa».

Les: – Vi bør satse mer på norsk animasjonsfilm

– Dette er vår tolking av Kjell Aukrust sitt univers – då kan vi ikkje basere oss på andre tolkingar! Difor har vi gått tilbake til bøkene, for å sjå på korleis han teikna dei.

I arbeidet med filmmusikken har det hatt større verdi å samanlikne med dei tidlegare filmane:

– Det er litt annleis med musikken, det finst jo ikkje musikk i bøkene. Men vi har snakka om at musikken ikkje må vere for moderne, det skal vere noko tidlaust over det heile. Vi har difor leika oss med retroelement frå alle tiåra frå 1960-talet og framover.

«Solan og Ludvig: Jul i Flåklypa» har premiere på kino 8. november.