– Me hadde ikkje venta fengselsstraff

Punk-gruppa Pussy Riot vart kjende verda over etter at dei framførte ein Putin-kritisk låt i ein katedral i Moskva i februar.

Tre av dei blei i august dømte for å ha forstyrra ro og orden motivert av religiøst hat, og to av medlemmene er dømt til to års fengsel.

Maria Alyokhina og Nadezhda Tolokonnikova er sende til ein fangeleir, som er kjent for svært tøffe forhold.

– Det er ein av dei mest skremmande fangeleirane i Russland. Det er veldig dårlege kår med tanke på mat, sanitæranlegg og forholdet mellom fangane, seier «Yozh» frå Pussy Riot, som er i Norge for å delta på Oslo World Music Festival.

– Faktisk må ein seie at fengselssystemet vårt ikkje er skapt for å forbetre folk, seier ho.

• LES OGSÅ: Pussy Riot-medlem kommer på Oslo-besøk

(Saka held fram)

Anonym

Ho kallar seg «Yozh», som tyder piggsvin, og er ein av fjorten medlemmer i Pussy Riot. Ho har på seg ei rosa finlandshette og vil vere heilt anonym av frykt for forfølging dersom det blir kjent kven ho er.

– Det er flott å vere i eit land som har eit tilnærma ideelt styresett, seier «Yozh» då ho blir ynskt velkommen til Lindmo.

«Yozh» fortel at biblioteket i fangeleiren inneheld berre overflatisk skjønnlitteratur, og at det er få moglegheiter for fangane til å utdanne seg. For dei to jentene, som har studert filosofi og litteratur, er dette naturlegvis ei ekstra påkjenning.

– Å ha moglegheit til å lese er den «friske lufta» dei hadde trengt for å klare seg i fangeleiren, seier ho.

• LES OGSÅ: Pussy Riot sendt til fangeleir

– Putin står bak

Gruppa, som fyrst og fremt kjemper for feminisme og rettane til lesbiske, homofile, bifile og transpersonar, trur det er Vladimir Putin som personleg står bak arrestasjonane i kyrkja, men på grunn av noko dei gjorde ein månad tidlegare.

I januar protesterte dei mot politikken til presidenten på Den raude plass i Moskva.

– Me hadde ikkje venta å få fengselsstraff for det me gjorde i kyrkja, seier «Yozh».

Ho fortel at alle som er ueinige med Putin har blitt utpeikt til fiendar. Folk flest er redde og vil ikkje støtte gruppa heime i Russland.

– Men det er andre som har det verre. Det er til dømes folk som lir fordi sosialsystema våre ikkje fungerer, seier ho.

(Saka held fram)

Skal halde fram

Mellom dei som har uttrykt støtte til gruppa er Aung San Suu Kyi og Madonna. «Yozh» seier gruppa vil halde fram med å kjempe for det dei står for.

– Me vil kjempe for at det skal vere OK for ei kvinne å forlate kjøkenbenken, ta på ei balaklava og kjempe for rettane sine på ein meir radikal måte, seier Yozh.

LES OGSÅ: Pussy Riot-medlem tar sak til Europa-domstolen

• LES OGSÅ: Russlands nye samfunnstenkning