BBC satsar på Ihle Hadland

BBC kunngjorde mandag at seks unge musikarar er plukka ut til å få status som New Generation Artists dei to komande konsertsesongane. Musikarane kjem frå Russland, Storbritannia, Tyskland, Spania og Noreg.

Christian Ihle Hadland frå Stavanger vert den første norske solisten som tek del i ordninga. Satsinga starta opp i 1999, og fiolinisten Marianne Thorsen tok del dei to første åra, som leiar av Leopold String Trio.

Les også: KORK-dirigent til BBC-orkester

Overtydde BBC i Bergen

Christian Ihle Hadland var ikkje tilgjengeleg for kommentar tirsdag, men manageren hans, Kathryn Naish Hjelsvold i Nordic Artists Management, kunne melde om ein svært fornøgd pianist:

– Christian er veldig glad for å kunne ta del i ordninga, dette passar perfekt inn i karriereplanane hans og er eit viktig springbrett vidare, seier Hjelsvold.

Leiarane for BBC-ordninga vart overtydde om å satse på Ihle Hadland under Festspillene i Bergen tidlegare i sommar:

– Eg har i to år jobba for å overtyde BBC om at Christian passar svært godt inn i opplegget deira. I tillegg til å vere ein glimrande pianist, er han allsidig og har eit repertoar dei kan bruke i mange samanhengar. I Bergen fekk dei oppleve han åleine, då han spelte Bach-musikk i Johanneskirken, og som kammermusikar. Dei var svært imponert over det dei fekk høyre.

Sjå Ihle Hadland spele med KORK: Sjå stjernepianistane briljere

Mange konsertar dei to neste åra

Christian Ihle Hadland har allereie mange oppdrag både i inn- og utland, og er kunstnerisk leiar for Kammermusikkfestivalen i Stavanger. Kalenderen hans nok blir endå tettare no:

– Han får i utgangspunktet spele to til fire konsertar som solist med eit av BBC-orkestera kvar av dei to sesongane, og om lag like mange solokonsertar og kammermusikkonsertar. Viss han gjer det godt, kan det bli endå meir – kanskje til og med konsertar under The Proms.

Mellom dei mest kjende artistane som har vore med i New Generation Artist-ordninga, er den nederlandske fiolinisten Janine Jansen, den svenske klarinettisten Martin Fröst og den makedonske pianisten Simon Trpceski.