Trur Pirate Bay kan vere død for godt

– Eg trur det er mindre enn 50 prosent sjanse for at The Pirate Bay kjem opp igjen. Sentrale personar har blitt arrestert og svensk politi har slått til mot serverane deira, seier Øystein Jakobsen, leiaren av Piratpartiet i Norge.

Angreip Sverige si regjering

Svensk politi slo til mot ein underjordisk bunkers sikra for å tole atomnedslag den 9. desember. Inne i hallen stod serverane til fildelingssida The Pirate Bay. Rett etter razziaen så falt sida ned, og den har ikkje kome opp igjen sidan.

Onsdag 17. desember så hevna hackargruppa Anonymous seg. Dei hacka epostane til den svenske regjeringa og statsrådane. Dei la ut epostadresse og passorda til kontoane på nettet og skreiv ei ironisk «god jul»-helsing til svenske myndigheiter.

(Saka fortset under bildet)

Overraska

Jakobsen har mange års erfaring innan IT-bransjen der han jobbar i dag. Datatryggleik har vore eit av spesialområda hans. Han gjorde store auge då han såg at The Pirate Bay blei liggande nede:

– Eg blei veldig overraska over dette. Eg trudde ikkje at dei hadde ei slik svakheit og at dei hadde sikra seg med reserve-løysingar når serverane blei tatt, seier Jakobsen og forklarar kva som skjedde då politiet i Sverige braut seg inn i den bunkersen:

– Dei har tatt lastbalanserarane. Det vil sei serverane som fordeler trafikken som kjem inn til The Pirate Bay til serverane som ligg rundt omkring. Utan desse så er det ingen til å vidaresende trafikken. Det blir som om du sender ei pakke, og den sentralen som skal sortere ut og sende posten vidare blir stengt.

Fildelinga aukar

Razziaen til trass: Fildelinga fortset som før. Eller for å vere meir presis: Timane etter at politiet slo til og The Pirate Bay-sida gjekk ned så gjekk talet på fildeling opp. Det viser statistikk frå Demonii, ei side som registrerer fildelinga frå The Piratebay og mange andre torrent-sider.

Tala viser at fildelinga fortset akkurat som før razziaen: Rundt 2,5 millionar «trackers» eller linkar til delte filer i minuttet. Trass i at The Pirate Bay ligg nede, så finst det hundrevis av andre tilsvarande sider. Jakobsen trur dei som står bak The Pirate Bay truleg ikkje ønsker å prøve å starte opp sida på nytt.

– Folk vil framleis laste ned

Jakobsen i Piratpartiet trur fildelinga vil fortsette for fullt på andre sider, om ikkje TV- og filmbransjen gjer det lettare å få tak i underhaldning:

– Fildeling er eit resultat av at film- og TV-bransjen ikkje har hengt med i timen. Folk er villig til å betale for underhaldning, om det er tilgjengeleg på ein lett og fornuftig måte. Etter at Spotify kom for musikken, så forsvann musikkdelinga. På Spotify kan du få all musikken på ein plass og folk betalar for det. Noko tilsvarande finst ikkje for TV-seriar og film, i dag er det lettare å laste ned gjennom fildeling enn å få det på lovleg vis, seier Jakobsen.