– Dát gal leat buorit ođđasat, lohká Vanja Katrine Madsen.
Guovtte máná eadni liiko ođđasiidda, mat muitaluvvojit su mátketelefovnna bokte. Romssa suohkana bajásšaddan- ja oahpahuslávdegotti ovttajienalaš mearrádus oainnat mearkkaša, ahte Guovssahas mánáidgárdi ii heaittihuvvo.
– Mii lea hirbmat ilus. Midjiide lea stuorra geahpádus ja illu go gielda min váldá duođas ja leat váldán áiggi vuđolaččat bargat áššiin. Gielddas leat guldalan min ja ádden manne dát ášši midjiide lea mávssolaš, lohká Madsen.
Árvaledje heaitthit
Guovssahas mánáidgárddis leat 28 sámegielat máná. Gitta diimmá čavčča rádjái ražai mánáidgárdi gávdnat oahppan sámegielat mánáidgárdeoahpaheaddjiid.
Danne mearridii gielddastivra geassit diibmá ovttastahttit gieldda guokte sámemánáidgárddi.
Dasto serve guktot mánáidgárddit pilohtaprošektii, man mihttomearri lea gávdnat doaibmabijuid mat oččodit eanet oahppan bargiid mánáidgárddiide.
Dát orru dássái lihkostuvvan.
Ná čilge Guovssahas mánáidgárddi fágalaš jođiheaddji, Inger Ellen Marja Eira:
– Mii leat dieđusge guhkit áigge rahčan rekrutteret sámegielat pedagogaid, ja oinniimet ahte lea dárbu doaibmabijuide. Dál mii almmuhit daid virgealmmuhusaid sámegillii maid, ja almmuhit veahá viidábut Ruoŧas ja Suomas maid.
Gielddastivra mearrida
Guovssahas mánáidgárdi lea sullii 200 mehtera eret Báhpajávrri skuvlla, gos sámi ossodat lea.
Dát lea stuorra ovdamunni váhnemiidda geain leat mánát sihke mánáidgárddis ja skuvllas.
Jus Guovssahas mánáidgárdi ja Sjømannsbyen mánáidgárddi sámeossodat ovttastahttošivčče, de sattašii váhnemiidda juohke iđđeda ja eahketbeaivve hohpposáigge sullii diimmu guhkit vuodjenáigi mánáidgárddi ja skuvlla gaskkas.
Romssa sámi váhnemat sávvet dál, ahte gielddastivra čuovvola bajásšaddan- ja oahpahuslávdegoddi evttoha dolahit guokte sámi mánáidgárdefálaldaga Romssas go gieđahallet ášši dán mánu 20. beaivve.
Gielddadirektevra ávžžuha álggus vuos ráhkadit ollislaš plána sámegielalaš mánáidgárde- ja skuvlafáladahkii Romssas.
Dán vuođul čielggaduvvo dasto vejolašvuohta ásahit sámi oahpahusguovddáža.
– Mus leat stuorra vuordámušat dál. Bajásšaddan- ja oahpahuslávdegotti ovttajienalaš mearrádus addá buori doaivaga. Mii čuovvut dárkilit mielde mii dás duohko dáhpáhuvvá. Doaivut, ahte gielddastivrras mearridit dan seammá, doaivu Madsen.