Váhnemat čurvot veahki heahtedilis

– Dilli lea dohkketmeahtton. Go leat unnán oahppan pedagogat, de soitet mánát massit sámegiel vuođđooahpu go mánáidgárdi ferte virgádit sadjásaččaid ja pedagogaid geat eai hálddaš sámegiela, čilge váhnen Inga Maija Sara NRK Sápmái.

Vássán jahkebealis leat máŋga bargi Guovssahasa mánáidgárddis Romssas heaitán. Dáid gaskkas guokte pedagogalaš jođiheaddji.

Dan dihtii leat 34 máná gártan almmá pedagogalaš jođiheaddji haga dán čavčča rájes.

iTromsø áviisa dat vuosttasin čálii dán áššis.

Mánáidgárddis ja gielddas ovddasvástádus

Pedagoganorpmas deattuhuvvo, ahte mánáidgárddis ja gielddas lea ovddasvástádus gáibidit unnimusat ovtta pedagogalaš jođiheaddjái juohke čieža vuollel golmma jahkásaš mánnái.

Seammás galgá leat okta pedagogalaš jođiheaddji juohke 14 mánnái badjel golbma jagi.

Guovssahas mánáidgárddi fágajođiheaddji, Anne Lill Sarabakken, lohká iežas áddet dango váhnemat leat duhtameahttomat.

– Mis lea buorre ovttasbargu váhnemiiguin ja mii ipmirdit váhnemiid go váidalit pedagogaváilli, lohká Sarabakken.

Mánáidgárddis leat ferten gávdnat gaskagoddosaš čovdosiid. Sii leat deavdán virggiid sadjásašbargiiguin.

– Mun barggan ieš beallevirggis pedagogalaš bargin. Earát fertejit de bargat mu hálddahusbarggu. Dan lea mielde buoredeamen dili, čilge Sarabakken.

Gielddas lea lohpi spiehkastit norpmas. Váhnemiid reivves gildii deattuhuvvo, ahte spiehkasteapmi ii galgga geavahuvvot vuoiŋŋastanguoddán beassat eret njuolggadusain.

– Gielda berrešii bidjat searaid doalahit bargiid ja virgádit ođđa pedagogaid, oaivvilda Sara.

Lassebálká ja fárrendoarjja

Dál leat dakkár doaibmabijut go 20.000 ruvdnosaš giellalasáhus jahkásaččat sámegielat pedagogaide.

Dasa lassin čuvge Tromsøya Vest Barnehager ovttadatjođiheaddji, Hilde Dahl Djupnes, ahte sii leat lasihan doaibmabijuid go almmuhit virggiid.

Dát doaibmabijut leat fárrendoarjja, gielda veahkeha skáhppot ássansaji ja sii láhčet maid dili dan láhkái ahte bargit sáhttet váldit oahpu.

Váhnemiin lea ávžžuhus sápmelaš pedagogaide geat háliidivčče miellagiddevaš ja hástaleaddji barggu.

– Boahttet Romsii! Oza barggu dáppe. Dáppe mis leat fiinna mánát ja don leat hui dehálaš min sámi mánáide, ávžžuha Inga Maija Sara.