Manne leam gellie aejkieh ussjedamme guktie bist toelhkine barkedh. Saemiedigkien tjåangkosne Karasjohkesne manne Vaino Perssonem råekeme, jih dïhte hov daajra guktie lea.
Barkoes toelhkestidh
Manne gihtjem guktie lea toelhkestidh? Vaino soptseste dïhte hov barkoes, joekoen gosse lea baakoeh maam ij dallegh muejhtieh. Bene guktie dellie gosse edtja jarkoestidh jih baakoem ij saemiengïelesne gååvnesieh?
– Dellie maahta hov nuhtjedh dom daaroen baakoem , Persson jeahta.
Dïhte aaj soptseste ånnetji geerve daaroengïeline. Vuesiehtimmien gaavhtan gosse naakene daaroengïele soptseste. Dle tjuara voestegh dom bijre ussjedidh, jih dle saemiengïelese jarkoestidh. Nøørjen jih Sveerjengïelesne ij lea gaajhkh baakoeh seamma.
Daerpies øøhpehtimmine
Härnösandesne toelhkeøøhpehtimmie gååvnese, jih Vaino lea dom øøhpehtimmiem vaalteme. Dïhte lea daerpies juktie maahta toelhkine barkedh.
Daelie medtie njieljie jaepieh toelkine barkeme, mohte daate lea voestes jaepien dïhte Nøørjen saemedigkesne toelhkeste. Jeenjemes pråvhka saemiedigkesne Sveerjesne jih jeatjah tjåangkojinie barkedh.
Luste feeledidh
Gosse manne gïhtjem mij lea lustemes toelhkebarkojne, dïhte onne ståantetjem funterde.
– Luste almetjigujmie gaavnesjidh, jih feeledidh. Jih baalka, gosse dïhte båata, Vaino jeahta jih føørhkede.