Muhto jos it astta vuordit gitta gaskavahkui, de mana odne jo nrksuper.no interneahttasiidui ja oza Stálugilvvuid. Golbma álgo prográmma beasat dál jo oaidnit neahtas:
Juohke prográmmas guokte roahkkadis máná lávkeba stálumáilbmái, gos galgaba veahkkálagaid gilvalit stáluin. Stállu lea ordnen gilvvuid danne vai oččošii mánáid iežas ruitui, muhto mánát jáhkket ahte sii sáhttet vuoitit ruovttoluotta fiinna juovlaskeaŋkkaid maid stállu lea suoládan.
Sámi máidnasiid vuođul ráhkaduvvon
Stálugilvvut vuođđuduvvá sámi máidnasiidda. Máŋggas leat sihkkarit gullan muitalusaid ja máidnasiid stálu birra ja mot mánát galggašedje rassat juovllaid áigge
Mánáide lávejit muitalit ahte ovdal juovlaruohta ferte šillju čorgejuvvot amas stáluráidu darvánit smáhkuide ja rissiide. Jos stáluráidu darvána masage, de ferte leat čáhci spánjas vai stállu beassá čáziin čáskadit goikkus iige dárbbaš vara šlubistit. Juovllaid áigge mánát galget leat maiddái siivot eaige oaččo rigeret amas stállu boahtit ja dohppet mielde. Juovllaid áigge ii galggaše čierastallat amas čierastit stálu sehkkii. Stálluhan ballá čuovggas ja danne johtá beare seavdnjadin.
Mánát gilvalit stáluin
Gilvvut leat čáhceguoddin, njoarosteapmi, áican ja šiellabivdu.
Stálugilvvut lea NRK Sámi mánáid-TV gilvoprográmma, mii lea ráhkaduvvon 7-12 jahkásaš mánáid várás. 15 prográgrámmas oaidnit 30 máná gilvaleamen ja mánát bohtet Sálliris Tromssas, Álttás, Guovdageainnus, Kárášjogas Vuotnabađas, Ohcejogas, Gáregasnjárggas, Gárasavvonis ja Čohkkirasas.
Stálugilvvut -prográmmat sáddejuvvojit NRK Superis. Vuosttaš prográmma čájehuvvo gaskavahku skábmamánu 30. beaivvi diibmu 17.00 NRK Superis.
Prográmmaid sáhttá maiddái geahččat NRK Supera interneahttasiidduin .