Buohkat čáhppadin gárvodan, veahá duolvas ja sahájaffonaga. Gánddain leat iešguđet ivdnásaš oaive- ja bealljesuojit. Bargosajis lea huikkas ja riedja, sahá gullosta šnjirramin ja veahčirat boŋket. Ja muhtin rávis olmmoš gullo doppe dirigeremin gánddaid.
Dá leat Sámi joatkkaskuvlla vuosttas jagi oahppit. Guokte mánu maŋŋá go álge skuvlii, de lea jo huksenlinjá oahppit garáša ceggemin.
– Ii lean issoras dakkaviđe huksegoahtit, go oahpaheaddji čájehii mo dat galggai leat. Lean illudan guhkká álgit huksenohppui. Lea oalle hástalus, muhto somá dat gal lea, muitala Niillas Magnus Skoglund (16).
OLLU OAHPPAN: Niillas Magnus Skoglund vuollamin fiellu.
Foto: Line Alette Bjørnback Varsi / NrkBoastut dahkan
Gánddain lea buorre ovttasbargu. Veahkkálagaid ceggejit stilasaid. Okta doallá fiellu starggasin ja nubbi fas sahá. Liikká, vaikko leage buorre ovttasbargu, de sáhttá maid boastut mannat.
– Meaddán gal lean dieđusge. Ii dušše oktii. Sahán boasttu mihtu, šadde veahá oanehabbot go galge. Muhtumat fas veahá guhkkit, muhto ii dat dahkan maidige. Daid gal sáhtten dušše sahát unnibun, joatká Niillas Magnus.
Boahtteáigi
– Go de gearggan dáinna oahpuin, de áiggun ohcat oahpahallin Kárášjogas ja de geahččalit dieđusge barggu oažžut dán maŋŋá. In áiggo vissa guođđit vel gándabieju, moadde jagi gal vel áiggun Kárášjogas orrut, reašká Skoglund.
