Logenár sámi artistta ja komponistta dollejit maŋŋebárgga riikkaidgaskasaš festiválii, mii lea máilmmi deháleamos árbevirolaš musihkkameassu.
– Mihttomearri lea oažžut eambbo olgoriikka beroštumi sámi musihkkii, nu ahte dat čuojahuvvogoahtá - ii dušše Sámis, muhto miehtá máilbmi, čilge Sámi Komponisttaid Searvvi jođiheaddji, Elin Kåven.
- Loga maid:
Womex mii lea jahkásaš festivála, lágiduvvo Santiago de la Compostela gávpogis Spánias miehtá dán vahku. Deikke bohtet álgoálbmot násttit juohke sajis máilmmis.
Sámi komponisttaid searvi ja Sámi Juigiid Searvi leat beassan ásahit sierra saji (stánda) dohko.
– Dalle sáhttit ieža márkanfievrridit ja vuovdalit iežamet musihka, illuda Kåven.
- Loga maid:
Galgá leat export-gálvu
HÁLIIDIT OVTTASBARGU: Ovttasbargu eará álgoálbmot musihkkáriiguin, attášii buoret vejolašvuođa eksperimenteret sámi musihkain, oaivvilda sámi musihkkár Magnus Vuolab.
Foto: Carl-Gøran Larsson / NRKProšeavtta sii gohčodit Sápmi Music Expo. Ulbmil lea oažžut sámi musihka beassat oassálastit máilmmifestiválain.
– Dan oktavuođas lea dehálaš čatnat oktavuođaid iešguđet ge riikka olbmuiguin, vástida musihkkár Magnus Vuolab.
Womex festiválas sii doivot maid oažžut impulssaid eará álgoálbmot musihkkáriin. Dasa lassiin sámi artisttat ja komponisttat háliidit vuodit iežaset musihka maiddái olgoriikka radiostášuvnnaide.
Vuosttaš geardde
Lea vuosttáš geardde ahte Sámi komponisttaid Searvi ja Juoigiid Searvi beasset oassálastit sierra stánddain Womex jahkásaš doaluin.
– Diibmá mii beasaimet háiket Norgga delegašuvnna mielde. Dál mii leat olahan ovtta lávkki guhkkelii, illuda Vuolab.
Stánddas sii juhket nu ollu dieđuid go vejolaš sámi musihka ja luđiid birra.
– Juohke artista lea ráhkadan guokte siidosaš presentašuvnna iežas musihka birra. Dasa lassin juohkit olggos Cd:aid maid leat almmuhan, muitala Vuolab.
Santiago de la Compostela gávpogis gos festivála lágiduvvo, galget leat konsearttat miehtá vahku iešguđet sajis gos máilmmi násttit besset guoimmuhit álbmoga.
