Son lea Sámi Komponisttaid Searvvi jođiheaddji, lea dál bargan 10 jagi artistan, su mielas livččii leamašan hirbmat buorre jus gávdnojit eanet olbmot geat barget sámi artistabirrasis.

• Loga maid: Kåven tolker samenes nasjonalsang

– Sámi musihkkamáilmmis leat dievva virggit, mat eai gula justa dasa ahte galgá čuožžut lávddi alde. Doppe lea vaikko makkár virggit musihkkaealáhusas, ja jus sámi musihkka galggaš ovdánit, de fertejit leat dakkár virggit maid dáppe dárbbašat, muitala Kåven.

Olu bargu

Ieš lea Kåven dušše deháleamos tiŋggaid dáfus ožžon veahki. Son lea geavahan fitnodaga, mas lea leamašan buvttadeaddji. Lea maid oastán promoveahki muhtumin, muhto reastta lea bargan ieš.

– Márkanfievrrideapmi ja bookinga (diŋgojumiid) ferten ieš doaimmahit, ja eanaš mu árgabeaiáigi manná dasa, muitala Kåven.

• Loga maid: Kvindøl med musikk fra hjertet

Son muitala ahte lea šaddan hirbmat čeahppi dál čállit e-poasttaid, muhto háliida geavahit áiggi hárjehallat ja ain čeahpput lávllut.

– Dán jagi lean dadjan ahte ferten hárjehallat, ja fertejin diktit buot bábirbargguid orrut. Mun ferten iežat vuovdi, ja jus in hárjehala dahje čále ođđa lávlagiid de ii leat mus mihkkege maid vuovdit, lohká Kåven.

Ja go dáid bábirbargguid ii daga, de čuohcá dat su sisabohtui. Jus ii bargga dáid, de ii lea sus bargu boahtte áiggis.

– Váttis dat lea. Muhto nu lea bargu, lohká Kåven.

Dárbbašit virggiid

Dál leat dušše moadde fitnodaga, mat veahkehit sámi artisttaid ollet viidáseappot máilbmái, ja Elin Kåven muitala ahte Sámis sáhtášii hukset eanet dánláganat fitnodagaid. Dalle šaddá álkit sámi artisttaide šaddat dovddusin.

– Mii sáhttit ieža dáppe hálddašit musihka. Mii diehtit mo mii háliidit govvidit iežamet musihka máilbmái. Mun lean maid vásihan ahte mii gulahallat hui bures rájáid rastá musihkka dáfus, lohká Kåven.

Su mielas lea gal hui buorre ahte sámi artisttat leat stuorra dáža fitnodagain, muhto lohká ahte dát ii heive juohke artistii.

• Loga maid: Musikksalget øker for første gang siden 1999

– Mun háliidivččen ahte galggašeimmet ieža hukset sámi fitnodagaid. Sii sáhttet vuovdit sámi artisttaid stuorra dáža fitnodagaide, jus artista háliida dan. Dán láhkái sáhtášii viiddidit bargovuogi sápmelaččaid gaskkas, mo mii ovddidit sámi musihka, muitala Kåven.

Muittuhus nuoraide

Dan dihte ávžžuha Kåven ahte nuorat geat beroštit musihkas, jotket dainna ja váldet oahpu das. Ja muitala vel ahte musihkkamáilbmi lea áibbas eará máilbmi go gávccis njealji rádjai bargu, lea áibbas sierra eallinvuohki.

– Dát lea diekkár muittuhus nuoraide erenomážit, ahte dáppe leat virggit. Mii dárbbašit bargiid dáppe Sámis, lohká Kåven.