Sámediggeráđđi lea gearggus buot vejolašvuođaid bakte caggat Nussira ruvkedoaimma Fálesnuoris. Sámediggeráđi lahttu, olgešbellodaga, Lars Filip Paulsen, lohka ovttasbarggu šiehtadallamin čielggadan ahte eará ovttasbargobellodagaiguin ahte sii ollásit dorjot Sámedikki oainnu ahte caggat Nussira ruvkedoaimma.
Dikki dahje ON bakte bissehit ruvkedoaimma
Sámediggeráđi lahttu, ja ruvkeáššiid ovddasvástideaddji Inger Eline Eriksen dadjá ahte ášši ii leat ollásit meannuduvvon Sámediggeráđis, ja lasiha ahte ráđđi lea gearggus juogo dikki dahje ON bakte hehttet Nussira ruvkedoaimma Fálesnuoris.
─ Sámediggeráđđi áigu gulahallat Sámedikki áirasiiguin Finnmárkkuopmodaga stivrras, ja dakko bakte geahččalit bargat ruvkedoaimma bisseheames Fálesnuoris. Nu dadjá Sámediggeráđđi, Inger Eline Eriksen. Son dadjá ahte ruvkedoaimma sáhttá FeFo bissehit, jus fal Sámedikki áirasat FeFo stivrras čuvot Sámedikki mearrádusa.
Eai doarjjo Nussira
Sámediggeáirras ja ráđđelahttu, Lars Filip Paulsen (Olgešbellodat) lohka sin nai áibbas vuostá Nussira ruvkedoaimma Fálesnuoris, ja lohka Sámediggeráđi fertet bargat buot maid sáhttet bissehit Nussira ruvkedoaimma áigumušaid Fálesnuoris.
Sihke Paulsen ja Eriksen dadjába ahte sii Sámedikki ovttasbarggu oktavuođas juo šiehtadan ahte okta sin áigumušain lea bissehit ruvkedoaimma