Sámedikkeráde le dálla gålmmå ájrrasijt nammadam barggojuohkusij mij galggá guovllomedisijnalasj guovdásjássjev (TDMS) suohkanstivrajda tjadnat, tjállá Sámedikkeráde præssadiedádusán.
– Mij lip åvdåsvásstádusáv válldám ávkálasj ságastallamav dagátjit varresvuodafálaldagáj birra julevsáme guovdátjin. Muv mielas la barggojuogos buorre båhtus mijá bargos, javllá Sámedikkeráde Henrik Olsen.
Ep TDMSajn joarke
Divtasvuona suohkanoajvve Tor Asgeir Johansen vásse vahko NRKaj javlaj suohkanin li ietjá plána ma varresvuodafálaldagájda guosská.
– Ep TDMS-bargujn joarke. Valla galggap gæhttjat makkir vejulasjvuoda li gå Ájluovtasalljov stuoredip, duola dagu jus Sámedikkijn aktisattjat máhttep barggat vaj suohkanin oadtjop avtaárvvusasj varresvuodafálaldagáv.
Vuorddemusá TDMSa tjanáduvvá
Sámedikkeráden li vuorddemusá suohkana aktan sámeájrrasij dálla TDMSav Stájgo, Divtasvuona ja Hábmera suohkanstivrajda tjadni.
– Dát la barggojuohkusa mandáhtta, ja divna oassálasste hæhttuji oassálasstet dájna mandáhtajn vuodon.
Sáme ájrrasa nammadam
Sámedikkeráde la dájt ájrrasijt sáme sebrudagás barggojuohkusij nammadam:
- Anna Kuoljok, persåvnålasj sadjásasj: Inga Karlsen
- Hugo Kalstad, persåvnålasj sadjásasj: Nils O. Nilsen
- Lars Filip Paulsen, persåvnålasj sadjásasj: Lars Magne Andreassen.
Sámedikkeráde sáme ájrrasijt nammat dan diehti gå Sámedikkeráden la sjiehtadus Stájgo, Hábmera ja Divtasvuona suohkanåjvij. Sjiehtadus la tjadádit TDMSa bargov mij la dálátjij dagádum, ja dáv suohkanstivrajda åvdedit, tjállá Sámedikkeráde præssadiedádusán.