NRK Meny
Normal

Gáivuona musihkka-bearaš

Rundberg bearrašis leat goit muhtumat beaggigoahtán sámi musihkkamáilmmis daid maŋemus jagiid. Dá eanet olles bearraša birra.

Olles Rundberg bearaš čuojaha
Foto: Priváhta

Gula Rundberg bearraša birra

Liv ja Øivind Rundberga vihtta máná barget buohkat musihkain.

Áhčči Øyvind liiko lávlut ruovttus ovttas bearrašiinnis dahje ovttas ustibiiguin, muhto ii fal almmolaččat. Eadni Liv lea pianistta ja organistta, ja son lea earret eará bargan ovttas sálbmalávluin Sara Máret Gaupain. Liv Rundberg čuojaha orgela "Vuoiŋŋalaš lávlagat" cdas man Sara Máret Gaup almmuhii 2002s.

Rundberg bearaš

Herman, Håkon, Hogne, Halvard ja Herborg Rundberg

Foto: Priváhta

Håkon Rundberg (39) lea boarraseamos bárdni. Son čuojaha saksufuvnna ja synthersizera, ja bargá dasa lassin musihkkabuvttadeaddjin. Earret eará leigga son ja su viellja Hogne buvttadeaddjin Nils Magnus Tornensisa luohte-cdas "Oarjjás". Dat joavku mainna Håkon dál bargá eanemusat lea Violet Road, mas su vieljat Hogne ja Halvard maid čuojaheaba.

Herborg Rundberg (33) lea áidná oabbá dán viđa máná joavkkus. ja son lea bearraša pianistta. Son lea oahpu gazzan Musikk-konservatorietas. Dál son bargá ollesáiggi musihkkaoahpaheaddjin Tromssas. Buolvvat koaras lea son dirigeanttan ja das láve maiddái eadni Liv čuojahit orgela. Herborg lea máŋga jagi bargan Riddu Riđđu festivála buvttadanjoavkkus. Ja dán festiválas moatte jagi čájehuvvui dološ filbma "Lájlá", mii lea nieidda birra gii bajásšaddá sápmelaččaid luhtte. Čájehettin dán filmma čohkkái Herborg sáles ja čuojahii iežas ráhkaduvvon musihka dán boares filbmii.

Hogne Rundberg (31) lea dat viellja dán bearrašis gii lea eanemus johtán ja bargan olgoriikkas. Son čuojaha bássa ja lea aittobaliid fárren ruovttoluotta Sápmái, go son lea johtán ja čuojahan Hangface joavkkuin Ameriikkas badjel golbma jagi. Dán joavkku fuomášii beakkán buvttadeaddji Eddie Kramer, gii lea bargan beakkániiguin nu go KISS, Jimi Hendrix, Led Zeppelin, David Bowie, Rolling Stones, The Beatles ja Slash, gii lei gitáristta Guns 'N' Rosesis. Ja beakkán gitaristtain Slashain beasaige sámi bárdni Hogne ovttasbargat, go galggai ráhkaduvvot cd mánáid várás. Hogne čuojahii bássa ovttas Slashain, ja dadjá ieš ahte dá lea su stuorimus vásáhus dássážii. Son lea maiddái mielde Englebarn joavkkus, mii galgá čuojahit Riddu Riđđus boahtte geasi.

Halvard Rundberg muitala

Herman ja Halvar Rundberg
Foto: Lill-Therese Holm varsi

Halvard Rundberg (25) lea várra dat dán bearrašis gii bargá eanemus joavkkuin. Lassin Alit Boazu jovkui čuojaha son gitára Mindtwist, Turdus Musicus ja Violet Road nammasaš joavkkuin. Áidna joavku dáin mas eai leat su vieljat fárus lea Turdus Musicus. Son lea maiddái nu go oabbá Herborg, bargan ollu Riddu Riđđu festiválain. Earret eará leigga soai Hermaniin mielde álggaheame Riddu Rock Sirkus mii lei vuohččan 2007s.

Herman (22) lea nuoramus Rundberg. Son čuojaha dávjjimusat rumbbuid, muhto Alit Boazu joavkkus čuojaha synthersizera. Lassin Alit Boazu jovkui čuojaha son vel Pipedream ja Mindtwist nammasaš joavkkuin.

Mindtwist joavku lea oalle earenoamáš. Dán joavkkus leat oainnát mielde njealjis geat gullet Alit Boazu jovkui, namalassii Herman ja Halvard Rundberg, Magnus Tornensis ja Ørjan Garfjell.

Herman lea maiddái leamaš buvttadeaddjin eará sámi artisttaide. Son lei váldobuvttadeaddjin Johan Kitti cds "Dovddut", ja son lei veahkkebuvttadeaddjin Sofia Jannok cdas "Čeaskat". Herman lei maiddái mielde go Mari Boine ja Svein Schultz ráhkadeigga filbmamusihka Nils Gaup filbmii "Guovdageainnu stuimmit".