Les på norsk
– Dát lea historjjálaš beaivi. Viimmat lea eambbogo 30 jagi sávaldat ja prošeakta ollašuvvan. Odne mii virggálaččat ásahat Romssa Sámi viesu OS:a - Samisk Hus Tromsø AS. Dát livččii galgan dahkkot jo moatti logijagi dassái.
Nu logai sátnejođiheaddji Gunnar Wilhelmsen (Bb) rahpansártnistis.
Oamasteaddjit Romssa gielda, Sámediggi ja Romssa ja Finnmárkku fylkkasuohkan bovdejedje odne virggálaš ásahančoahkkimii.
Čoahkkin dollui Romssa ráđđeviesus.
– Munnje lea lunddolaš, ahte mii rahpat dákkár sámi viesu dáppe Romssas. Romsa lea máŋggakultuvrralaš, rabas ja fátmmasteaddji gielda, deattuha Wilhelmsen.
Hárjánan stivrrajođiheaddji
Professor ja Romssa universitehta Sámi duktama guovddáža jođiheaddji, Torjer Olsen, lea Romssa Sámi Viesu stivrrajođiheaddji.
– Munnje lea stuorra gudni nammaduvvot dán doibmii. Mus leat čeahpes olbmot stivrras. Ovttas áigut mii bargat ollašuhttit Romssa Sámi Viesu, čilge Olsen.
Stivrra bargu lea earret eará oažžut sadjái buot geavatlaš beliid, mat gusket ođđa fitnodahkii. Dasto galggašedje gávdnat heivvolaš saji gos ođđa Romssa Sámi Viessu galgá leat.
Romssa Sámi Viessu galgá leat sámi deaivvadanbáiki Romssas. Dat galgá leat mielde doaimmaheamen ja ovdánahttimin sámi dáidaga ja kulturarena Romssas čielga sámi vuoiŋŋain.
Dáppe galgá sáhttit vásihit, ovdánahttit ja boahttevaš buolvvaide viidáset fievrridit sámegiela, sámi dáidaga ja sámi kultuvrra.
Oasussearvvi badjebáza galgá geavahuvvot doaimmaide mat sohpet fitnodaga ulbmiliiguin.
Golbma oamasteaddji nammadit guhtta stivrralahtu, ja sii virgádit beaivválaš jođiheaddji ja gávdnet heivvolaš viesu doibmii.
– Ii čielggas gosa galggašii ásahuvvot
Torjer Olsen muitala NRK:ii ahte ii vel leat čielggas gosa Romssa Sámi Viessu galggašii ásahuvvot.
– Dán áššis lea ekonomiija dehálaš. Mii fertet gávdnat dakkár saji mii lea lahka gávpotguovddáža. Ferte leat dakkár báiki gosa ollugat sáhttet dádjadit. Dohko galgá leat álki beassat, čilge Olsen.
Olsen lohká, ahte Romssa Sámi Viessu álgoáiggis soaitá šaddat jođašit veahá báikkis nubbái.
– Sápmelaččat han leat árbevirolaččat johtán olu. Danne lea midjiide lunddolaš dohkkehit dákkár dili, čilge Olsen.
Sátnejođiheaddji Gunnar Wilhelmsen dovddaha, ahte Sámi Viesus ráđđevissui galggašii leat oanehis vázzingaska .
Sámi viessu Romssas
Badjel 30 jagi lea beaggán ahte Sámi viessu galgá asahuvvot Romsii.