Min Áigi čálii jagis 2003 skearroárvvoštallama mas garrasit cuiggodedje Ann-Mari Andersena ođđa skearru "Ija Hearva", mii dalle almmuhuvvui. Seammás rámidii áviisa Dagbladet dán skearru balvvaid sisa ja attii dasa nubbin buoremus árvosáni. Nordlys váldodoaimmaheaddji Hans Kristian Amundsen oaivvilda dán čájehit, ahte sámi mediat leat roahkkadeappotgo dáža mediat go árvvoštallet sámi kultuvrralaš ovdanbuktima.
Joavdan guhkkeleabbui
- Juo, dát lea ovdamearkan dasa ahte sámi mediat leat joavdan guhkkeleabbui go dáža mediat. Sámi áviissain ja NRK Sámi Radios leat ovttaláhkái geargan nášuvdnahuksemiin, namalassii goas lei dárbu čájehit ovttaoaivilvuođa ja návccaid ja rámidit iežas olbmuid. Dál sii čuvvot mielde das mii dáhpáhuvvá sámi servodagas, maiddái dan mii dáhpáhuvvá kultureallimis. Dalle lea vuogas sihke geahččat (observere), cuiggodit ja leat rehálaš. Dát lea vuogas sámi mediaide, muhto ii nu vuogas dáža mediaide, oaivvilda Amundsen.
Bálká politihkalaš barggu ovddas
Amundsen dego bávkala albma bensiidnabombba go dáhton su buktit ovdamearkkaid das makkár sámi dáiddárat rámiduvvojit duššiid dihtii.
- Synnøve Persen lea buorre olmmoš, muhto son oažžu mávssu dáiddalaččat dan áŋgiruššama ovddas maid lea dahkan sámi álbmoga ávkin. Mun lean vissis dasa, ahte su dáidagis ii leat nu alla dássi go dan maid muhtin árvvoštallit vikkahit, cuiggoda Amundesen.
Dušše buriid árvosániid
Beaivváš Sámi Teáhter lea maid ovdamearkan dasa mo sámi dáidda álo dušše rámiduvvo, iige cuiggoduvvo. Amundsen almmatge ii duohta jáhke, ahte teáhter duodaid lea nu čeahppi go ovdamearkka dihtii su áviissas Nordlysas boahtá ovdan.
- Beaivváža maŋimuš čájalmas (Ridn`oaivi ja nieguid oaidni) ovdamearkka dihtii oaččui buriid árvosániid. Mun biehttalan jáhkkimis dasa ahte dánson, jietnageavaheapmi ja nu ain lei nu buorre ahte ii livčče dan sáhttán cuiggodit. Danne lea imaš go dáža mediain eai duostta albma heajos árvosániid addit teáhterii, lohká Hans Kristian Amundsen.