Sávvá filmmain oažžut ipmárdusa iežas dillái

– Mu mielas gal lea hui buorre go muhtin berošta ja oaidná mot mun bártidan ja geahččala govvidit mot dat lea, lohká Sokki.

Peder Sokki lea bajásšaddan boazodoallobearrašis Guovdageainnus ja boazodoallu lea leamaš su eallin čađat.

1990-logu álggu rájes lea son geahččalan alcces ordnet siidaoasi vai beasašii birget boazodoalus. Son lea ožžon sihke iežas čeazi ja eagi doalu, muhto ii su orohat (Orda), eaige eiseválddit leat dohkkehan dán.

• Loga eanet: Tingretten: Reineier har ikke en lovlig siidaandel

– Vigget su duvdit eret

Filbmadahkki Håkon Isak Vars máŋga jagi čuvvon Sokki ja oaidnán mot son lea rahčan ja geahččalan veahkehit su.

– Lea stuora boasttuvuohta go su duvdet eret boazodoalus, ja eai atte dasa daid siidaosiid maid lea ožžon. Mun lean ieš maid bártidan eiseválddiiguin boazodoallorivttiid alde, nu ahte mun dieđan man lossat dat lea akto bargat, lohká Vars.

Dál lea Vars ráhkadan 23 min guhku filmma, mas govvida Sokki lossa dáistaleami oažžut lobálaš boazodoalu.

– Mun lean ráhkadan filbmabihtá vai olbmot besset oaidnit mii dat lea dáhpáhuvvan suinna, dadjá Vars.

Geahča dá filmma Youtubas.

Ferte gávdnat siidaoasi

Diibmá ovdal juovllaid oaččui Sokki dieđu boazodoalloeiseválddiin ahte sus lea lobihis doallu ja ferte njuovvat ealu, dahje gávdnat siidaoasi man vuolde sáhttá lobálaččat bargat bohccuiguin.

• Loga eanet: I hele sitt liv har han kjempet for retten til å leve i reindrifta – Nå tvinges han til å slutte

Dán mearrádusa váiddii son boazodoallostivrii.

Stivra lea gaskavahkku mearridan doalahit eiseválddit mearrádusa áššis, muhto leat addán Sokki olggos dán jagi gávdnat siidaoasi man vuolde sáhttá bargat vai su doallu šaddá lobálažžan.

– Boazodoalloeiseválddit galget gulahallat Sokkin ja geahččalit suinna fárrolaga gávdnat čovdosa vai son sáhttá joatkit boazodoalus, lohká boazodoallostivrra jođiheaddji Inge Ryan.

Čuohcá garrasit

Sokki mielas boazodoallostivra dáinna mearrádusain lea dušše maŋidan bággonjuovvama.

– Psyhkalaččat dat diet čuohcá goit: Mun šattan ain lobiheapme, jagi vel lobiheapme, lohká Sokki.

Son ii loga vejolažžan gávdnat eará siidaoasi gos sáhttá bargat bohccuiguin

– Mun lean jo ožžon guokte, sihke čeazis ja eagis mat eai leat dohkkehuvvon, dál in šat oza eará, dadjá Sokki.

Boazodoallostivra jođiheaddji Inge Ryan lohká ipmirdit dan váttes dili mas Sokki lea, ja sávvá ahte gávdnošii čoavddus nu ahte Sokki ain sáhtášii bargat bohccuiguin.

– Dán áššis lea guhkes historjá ja ollu lea dáhpáhuvvan ovdal mii livččii sáhttán dahkkot eará ládje. Muhto Sokki ii leat vel veadjemeahttun dilis, go mii áigot ain geahččalit gávdnat čovdosa sutnje, lohká Ryan.

NRK ii leat ožžon Orda orohaga ovdaolbmo ságaide kommenteret ášši.

Mats soaitá šaddat botket máŋgačuođi jagi boares bearašárbbi

Ráhkada filmma iežas orohaga diggeáššis

Gii sáhttá «árbet» váhnemiid boazodoalu?