Oajvvat bádneklinihkav hiejttet: – E rat buvte dárostit

Les på norsk.

– Sjaddá vájvve mijá mánájda gudi sámásti ja adni sámegielav iednegiellan, ja e rat buvte dárostit, javllá Viejega mánájgárde stivrrajådediddje Jørgen Kintel.

Nordlánda fylkasuohkan ájggu avtastahttet bádneklinihkav Ájluovtan bádneklinihkajn Badjesijdan vaj rudájt siessti ja fáhkabirrasav tjoahkki.

Oajvvadus la læhkám guláskuddamin, ja fylkadigge galggá plánaj milta mierredit javllamánon.

– Mån lav vuojnnám gåktu máná tjuovggi gå duostoduvvi ietjasa giellaj bádneklinihkan. Dat vaddá jasskavuodav, javllá Kintel.

Les også Sjaddá julevsáme ressurssaskåvllå: – Årnik mij bissu

Bajássjaddam sámegielajn

Kintel subtsas iesj julevsámegielajn bajás sjattaj, valla giella ittjij árvvon aneduvá.

– Muv niehko le ahte muv máná galggi dåbddåt ahte sebrudagán li sáme sæmmi dásen dagu dáro máná, ahte sij oadtju åtsådallat jut duostoduvvi sámegiellaj ja sámegiella le árvvon sebrudagán, javllá sån.

Suv mielas ij la dåhkkidahtte argumænnta juhte pasienta máhtti vuolgget 35 kilomiehttara Badjesijddaj.

– Dát ij la gasska ja vuodjema diehti. Sáhka l giela, kultuvrra ja jasskavuoda birra. Sáme máná li dáppe Ájluovtan, ja galggi dåbddåt sijá gielan la luondulasj sadje sebrudagán, javllá Kintel.

Dåssju bielle jagev galgaj årrot

Bádnesujttár Elisabeth Klevstad galgaj dåssju jahkebielev Ájluovtan årrot gå bådij jåhttå, valla báhtsaj. Barggam la bádneklinihkan Ájluovtan 2015 rájes.

Maŋenagi oahppaj julevsámegielav gå vuojnij dárbov gå enap pasientajs dåssju sámásti.

– Jus klinihkka hiejteduvvá, de baláv luohtádus majt lip jagij tjadá tsieggim, vat doajeduvvá. Ij la dåssju sáhka vuodjema birra. Dánna l juoga tjiegŋalabbo.

Klevstad javllá mærrádus máhttá garrasit luohtádusáv doadjet julevsáme guovddaguovlon.

– Bádnevarresvuohta ij la dåssju bánij birra. Moaddása gudi li vásedam vájves ássjijt máhtti oadtjot dålusj mujtojt åvdepájges gå li bádneklinihkan. De hæhttup sijáv duosstot jasskavuodajn, dádjadusájn ja sáme kulturmáhtudagájn, javllá sån.

Klevstad dádjat fylkasuohkana dárbov rievddadimijda, valla suv mielas ij máhte gålojt biednigijn mihttit.

– Gatjálvis ij beras liehket juhte miján la ráde klinihkav bisodit. Dat bierri liehket juhte miján la ráde masset dav mij dat åvdås: luohtádusáv, gielav ja jasskavuodav sáme guovddaguovlon, javllá Klevstad.

Fylkaráde: Sæmmi fáláldahka – rabás prosæssa ja sámegiella galggá bærrájgåhtseduvvat

Ij la dåssju Ájluovta bádneklinihkka mij oajvvaduvvá hiejtedit. Fylkasuohkan gehtjat vejulasjvuohtaj lågev bádneklinijkajt hiejtedit.

Fylkaráde Lise Henriette Rånes (Bb) duodas Nordlánda fylkasuohkan la oajvvadusáv sáddim ådå bádneklinihkkastruktuvrraj. Guláskuddama ájggemierre lij gasskavahko.

– Fylkasuohkanin la dárbbo nuppástuhttemij. Mij bádnevarresvuodadievnastusáv divras ja fragmentieridam láhkáj dåjmadip, ja miján li hásstalusá gå galggap barggijt rekruttierit, javllá Rånes.

Rånes dættot juhte pasienta galggi sæmmi fálaldagáv oadtjot gå uddni, valla ietjá sajen.

– Dát ij la bádnevarresvuoda hiejtedibme. Ressursa sjaddi sæmmi, valla tjoahkkiduvvi akta klinihkkaj, javllá sån.

Rånes la manádam gájka guoskavasj suohkanijda iejvvitjit pasientajuohkusijt, oassálasstemrádev ja sáme siebrijt.

Suv mielas ij aktidibme galga dádjaduvvat degu guovdustibme mij sámegielav nievret.

– Sihtap stuoráp fáhkabirrasav tsieggit, valla sihtap vilá barggijt sámegielmáhtudagájn. Lip julevsáme álmmugis ándagis ádnum åvdep verrudagáj åvdås, ja barggo luohtádusá åvdås joarkká, javllá sån.

– Iv diede jus joarkáv

Bádnesujttárij Elisabeth Klevstadaj merkaj rievddam ienep gå ådå barggosadje.

Iehpet de juhte sujna l arvusmahttem bargujn joarkket jus barggosadje sirddá.

– Ij la dåssju praktihkalasj dile birra. Sáhka l mij barggo merkaj. Dánna besav gielav, kultuvrramáhtudagáv ja relasjåvnåjt adnet majt badjel lågev jage tjadá lav nannim, javllá sån.

Subtsas Ájluovta klinihkka l læhkám guovdásj bargguj sáme gielajn ja kultuvrajn varresvuohtadievnastusán.

– Mánájt ja vuorrasijt æjvvalit sámegielajn vaddá jasskavuodav ja buktá luohtádusáv. Jus dat gáhtu, massep juojddá mij ij dåhkki dan sadjáj biedjat, javllá Klevstad.