NRK Meny
Normal

Oaččui Sámiráđi gudnebálkkašumi: – Dá lea stuorimus maid sápmelaš sáhttá oažžut

Ole Henrik Maggai, gielladutki ja politihkkár, geigejuvvui Sámiráđi gudnebálkkašupmi, mii dušše geigejuvvo juohke njealját jagi.

Ole Henrik Magga med mikrofon og blomster sammen med Áile Javo

Ole Henrik Magga gudnejahttojuvvui Tråante 2017 ávvudeami oktavuođas, ja oaččui Sámiráđi gudnebálkkašumi, maid Sámiráđi presideanta Áile Javo geigii sutnje.

Foto: Ann Mariela Idivuoma / NRK

Son gean mii odne gudnejahttit lea dákkár geainna mii buohkat čevllohallat. Ii son leat dušše midjiide sámiide leamaš njunuš ja pioneara, muhto sus lea alla násti maid eamiálbmogiin miehtá máilmmi su riikagaskasaš doaimmaid dihte.

Nie dadjá Sámiráđi presideanta Áile Javo, ovdalgo bovdii Ole Henrik Magga lávdái. Juohke njealját jagi juohká Sámiráđđi gudnebálkkašumi olbmui gean áŋgiruššan leamaš erenoamáš mearkkašahti sáme oktavuhtii ja kultuvrii.

– Munnje mearkkaša dát erenoamážit. Mun gal lean ožžon eará bálkkašumiid maid, muhto dat ahte oažžut bálkkašumi Sámiráđis, min iežamet álbmoga oktasaš orgánas, dat lea stuorimus maid sápmelaš sáhttá oažžut, dadjá ilolaš Magga NRK:i.

Gielladutki, ovddeš politihkkár ja vuosttaš sámediggepresideanta, Ole Henrik Magga, lea fargga 50 jagi áŋgiruššan sámi servvodaga ovddas, sihke politihkas, riika servviin, sámi servviid ásaheamis, ja lea ain aktiivvalaš doaimmain masa sámi servvodat lea čájehan sutnje luohttámuša.

Ole Henrik Maggai, gielladutki ja politihkkár, oaččui Sámiráđi gudnebálkkašupmi, mii dušše geigejuvvo juohke njealját jagi.

Geahča jearahallama Ole Henrik Maggain. Govven: Anna-Karin Niia