Son gean mii odne gudnejahttit lea dákkár geainna mii buohkat čevllohallat. Ii son leat dušše midjiide sámiide leamaš njunuš ja pioneara, muhto sus lea alla násti maid eamiálbmogiin miehtá máilmmi su riikagaskasaš doaimmaid dihte.
Nie dadjá Sámiráđi presideanta Áile Javo, ovdalgo bovdii Ole Henrik Magga lávdái. Juohke njealját jagi juohká Sámiráđđi gudnebálkkašumi olbmui gean áŋgiruššan leamaš erenoamáš mearkkašahti sáme oktavuhtii ja kultuvrii.
– Munnje mearkkaša dát erenoamážit. Mun gal lean ožžon eará bálkkašumiid maid, muhto dat ahte oažžut bálkkašumi Sámiráđis, min iežamet álbmoga oktasaš orgánas, dat lea stuorimus maid sápmelaš sáhttá oažžut, dadjá ilolaš Magga NRK:i.
Gielladutki, ovddeš politihkkár ja vuosttaš sámediggepresideanta, Ole Henrik Magga, lea fargga 50 jagi áŋgiruššan sámi servvodaga ovddas, sihke politihkas, riika servviin, sámi servviid ásaheamis, ja lea ain aktiivvalaš doaimmain masa sámi servvodat lea čájehan sutnje luohttámuša.